نئی دہلی: بدھ کو سپریم کورٹ نے کہا کہ بہار میں پہلے کیے گئے ووٹر فہرست کے مختصر تجدیدِ نظر میں دستاویزات کی تعداد سات تھی جبکہ خصوصی گہری تجدیدِ نظر (SIR) میں یہ 11 ہے، جو ظاہر کرتا ہے کہ SIR ووٹر دوست (Voter-friendly) ہے۔

جسٹس سری کانت اور جسٹس جئے مالیا باگچی کی بنچ نے بہار میں خصوصی گہری تجدیدِ نظر (SIR) کرانے کے الیکشن کمیشن کے 24 جون کے فیصلے کو چیلنج کرنے والی عرضیوں پر دوبارہ سماعت شروع کی اور کہا کہ اگرچہ عرضی گزاروں کا یہ کہنا ہے کہ آدھار کو قبول نہ کرنا ایک غیر معمولی بات ہے، لیکن ایسا معلوم ہوتا ہے کہ زیادہ تعداد میں دستاویزات کی شمولیت درحقیقت جامعیت کی عکاسی کرتی ہے۔

بنچ نے کہا، ریاست میں پہلے کیے گئے مختصر تجدیدِ نظر میں دستاویزات کی تعداد سات تھی اور SIR میں یہ 11 ہے، جو ظاہر کرتا ہے کہ یہ ووٹر دوست ہے۔ ہم آپ کی دلیل سمجھتے ہیں کہ آدھار کو قبول نہ کرنا غیر معمولی ہے، لیکن زیادہ تعداد میں دستاویزات شامل ہونا حقیقت میں جامعیت کا مظہر ہے۔ سپریم کورٹ نے کہا کہ ووٹروں کو فہرست میں شامل 11 دستاویزات میں سے کوئی ایک جمع کرانا ضروری تھا۔

عرضی گزاروں کی جانب سے سینئر وکیل ابھیشیک سنگھوی نے اختلاف ظاہر کرتے ہوئے کہا کہ اگرچہ دستاویزات کی تعداد زیادہ ہے لیکن ان کا دائرہ محدود ہے۔ انہوں نے پاسپورٹ کی دستیابی کی مثال دیتے ہوئے کہا کہ بہار میں پاسپورٹ رکھنے والوں کی تعداد ایک سے دو فیصد ہے اور ریاست میں مستقل رہائشی سرٹیفکیٹ دینے کا کوئی انتظام نہیں ہے۔ سنگھوی نے کہا، اگر ہم بہار کی آبادی میں دستاویزات کی دستیابی دیکھیں تو معلوم ہوگا کہ دائرہ کار بہت محدود ہے۔

بنچ نے کہا کہ ریاست میں 36 لاکھ پاسپورٹ رکھنے والوں کی تعداد کافی اچھی لگتی ہے۔ جسٹس باگچی نے کہا، زیادہ سے زیادہ دائرہ کار کو یقینی بنانے کے لیے عام طور پر مختلف سرکاری محکموں سے فیڈ بیک لینے کے بعد دستاویزات کی فہرست تیار کی جاتی ہے۔

گزشتہ 12 اگست کو  عدالت نے کہا تھا کہ ووٹر فہرست میں شہریوں یا غیر شہریوں کو شامل کرنا یا نکالنا الیکشن کمیشن کے دائرہ اختیار میں ہے اور بہار میں ووٹر فہرست کی SIR میں آدھار اور ووٹر شناختی کارڈ کو شہریت کا حتمی ثبوت نہ ماننے کے کمیشن کے موقف کی عدالت نے تائید کی تھی۔

ایس آئی آر کے مسئلے پر پارلیمنٹ کے اندر اور باہر احتجاج کے درمیان سپریم کورٹ نے یہ بھی کہا کہ یہ تنازع ’’بڑی حد تک عدم اعتماد کا مسئلہ‘‘ ہے کیونکہ الیکشن کمیشن کا کہنا ہے کہ بہار میں کل 7.9 کروڑ ووٹروں کی آبادی میں سے تقریباً 6.5 کروڑ افراد کو اپنے یا اپنے والدین کے لیے کوئی دستاویز جمع کرانے کی ضرورت نہیں تھی، بشرطیکہ ان کے نام 2003 کی ووٹر فہرست میں شامل ہوں۔