نئی دہلی: جنوبی کوریا کی نیشنل انٹیلی جنس سروس (این آئی ایس) یہ جاننے کی کوشش کر رہی ہے کہ شمالی کوریا کے رہنما کِم جونگ اُن کا کوئی بیٹا بھی ہے یا نہیں۔ تاہم ایجنسی کا اندازہ ہے کہ کِم جونگ اُن کی نوعمر بیٹی کے ان کے جانشین بننے کے امکانات زیادہ ہیں۔

این آئی ایس نے جمعرات کو ایک بیان میں کہا کہ اگر کِم جونگ اُن کا کوئی بیٹا ہے بھی تو موجودہ صورت حال میں وہ ان کا جانشین بننے کی پوزیشن میں نہیں ہے۔ کِم جونگ اُن نے 2011 میں اپنے والد کِم جونگ اِل کی وفات کے بعد شمالی کوریا کی حکومت کی باگ ڈور سنبھالی تھی۔

این آئی ایس نے اپنے سابقہ اندازے کو دہراتے ہوئے کہا کہ کِم جونگ اُن کے بعد شمالی کوریا کی حکومت کی کمان ممکنہ طور پر ان کی بیٹی کے ہاتھ میں ہوگی، جس کا نام کِم جو اے بتایا جاتا ہے اور اس کی عمر تقریباً 13 سال ہے۔ ایجنسی نے کہا کہ وہ اب بھی یہ معلوم کرنے کی کوشش کر رہی ہے کہ آیا کِم جو اے کا کوئی بڑا بھائی ہے، لیکن موجودہ حالات میں اگر ایسا کوئی بھائی موجود بھی ہے تو وہ اپنے والد کا جانشین نہیں بن سکتا۔

این آئی ایس کے مطابق کِم جونگ اُن کی ایک اور اولاد بھی ہے، لیکن فی الحال یہ معلوم نہیں ہو سکا کہ وہ لڑکا ہے یا لڑکی۔ بیان میں کِم جو اے کی مضبوط سیاسی حیثیت سے متعلق این آئی ایس کے اندازے کی تفصیلات نہیں دی گئیں۔ تاہم ایجنسی نے کِم جو اے کی سابقہ عوامی سرگرمیوں اور اسے دیے جانے والے سرکاری پروٹوکول کے تفصیلی تجزیے کا حوالہ دیتے ہوئے کہا کہ اس کے کِم جونگ اُن کی جانشین بننے کے امکانات بہت زیادہ ہیں۔