جوہانسبرگ: وشو ہندو پریشد کی جنوبی افریقہ شاخ کی جانب سے ہفتہ کے روز پریٹوریا میں منعقد ہونے والی قومی ہندو کانفرنس میں جنوبی افریقہ کو درپیش مختلف چیلنجز سے نمٹنے کے اقدامات پر غور کیا جائے گا۔ کانفرنس کا موضوع “دی نیشنل ری سیٹ – اے وژن فار اے پروگریسو ساؤتھ افریقہ” رکھا گیا ہے۔

اس میں ملک بھر سے روحانی رہنما، ماہرینِ تعلیم، پیشہ ور افراد، نوجوان نمائندے اور کمیونٹی تنظیموں کے مندوبین شرکت کریں گے۔ یہ کانفرنس 2024 میں منعقد ہونے والی پہلی قومی کانفرنس کی کامیابی کے بعد منعقد کی جا رہی ہے، جس میں درجنوں ہندو تنظیموں نے متحد ہو کر بہتر ہم آہنگی، وکالت اور نمائندگی کے لیے مشترکہ مطالبہ پیش کیا تھا۔

منتظمین کے مطابق اس سال کا پروگرام محض مکالمے تک محدود نہیں ہوگا بلکہ ایک ٹھوس لائحۂ عمل تیار کرنے پر مرکوز ہوگا، جس کے تحت کمیونٹی کی ترقی اور قومی خدمات کے لیے عملی اقدامات کی حکمتِ عملی وضع کی جائے گی۔ وی ایچ پی (جنوبی افریقہ) کے جنرل سیکریٹری پرویش ہرڈین نے کہا،جنوبی افریقہ ایک اہم موڑ پر کھڑا ہے۔

ملک بھر کی کمیونٹیز معاشی غیر یقینی صورتحال، نوجوانوں میں بے روزگاری، سماجی انتشار اور ذہنی صحت سے متعلق چیلنجز کا سامنا کر رہی ہیں۔ ‘نیشنل ری سیٹ’ کا تصور ہمیں سناتن دھرم کی دائمی تعلیمات سے رہنمائی لیتے ہوئے موجودہ مسائل کے حل میں فعال کردار ادا کرنے کی دعوت دیتا ہے۔ کانفرنس کے دوران مکمل اجلاس، مذاکرے اور گروپ ورکشاپس منعقد کی جائیں گی، جن میں ثقافتی شناخت، اخلاقی قیادت، سماجی بہبود اور شہری شمولیت جیسے موضوعات پر تبادلۂ خیال کیا جائے گا۔