سنگاپور سٹی: وزیر خارجہ ایس جے شنکر اور سنگاپور کے وزیر خارجہ ویویئن بالاکرشنن نے بدھ کے روز مشترکہ طور پر بھارتی ہائی کمیشن کے نئے چانسری کمپلیکس کا سنگ بنیاد رکھا۔ دونوں رہنماؤں نے ہندوستان اور سنگاپور کے درمیان دوطرفہ شراکت داری کو مزید مضبوط بنانے کے طریقوں کا بھی جائزہ لیا۔

وزیر خارجہ نے ’ایکس‘ پر متعدد پوسٹس کے ذریعے اس کی تفصیلات شیئر کرتے ہوئے سنگ بنیاد رکھے جانے پر خوشی کا اظہار کیا۔ انہوں نے کہا کہ یہ کمپلیکس ہندوستان-سنگاپور جامع اسٹریٹجک شراکت داری کے نئے دور کی عکاسی کرے گا اور سنگاپور میں مقیم ہندوستانی برادری کے لیے خدمات کو مزید مضبوط بنائے گا۔

ایک اور پوسٹ میں جے شنکر نے کہا کہ دونوں رہنماؤں نے جامع اسٹریٹجک شراکت داری کو مزید گہرا کرنے کے طریقوں پر تفصیلی بات چیت کی۔ اس دوران موجودہ جغرافیائی سیاسی صورتحال پر بھی تبادلہ خیال کیا گیا۔ جے شنکر نے کہا، ’’کل ہونے والے چوتھے ہندوستان-سنگاپور وزارتی گول میز اجلاس کے دوران ان کے ساتھ مزید بات چیت کا منتظر ہوں۔‘‘ حکومت کے مطابق ہندوستان-سنگاپور وزارتی گول میز اجلاس میں کئی شعبوں پر بات چیت ہوتی ہے، جن میں بنیادی طور پر جدید مینوفیکچرنگ، رابطہ کاری، صحت اور ہنرمندی کی ترقی جیسے شعبے شامل ہیں۔ یہ وہ شعبے ہیں جو ’وکست ہندوستان‘ (ترقی یافتہ ہندوستان) کے منصوبے کو نمایاں طور پر فروغ دیتے ہیں۔

وزارت خارجہ کے ترجمان رندھیر جیسوال نے منگل کے روز نئی دہلی میں ہفتہ وار پریس بریفنگ کے دوران بتایا کہ چوتھا ہندوستان-سنگاپور وزارتی گول میز اجلاس (ISMR) 20 اگست کو سنگاپور میں منعقد ہوگا۔ اس اجلاس میں دوطرفہ تعاون کے اہم شعبوں پر توجہ مرکوز کی جائے گی، جس کا مقصد دونوں ممالک کے درمیان اسٹریٹجک اور اقتصادی تعلقات کو مزید مضبوط بنانا ہے۔ انہوں نے بتایا کہ اس اجلاس میں ہندوستان کی جانب سے چار وزراء شرکت کر رہے ہیں، جن میں وزیر خزانہ، وزیر خارجہ، وزیر تجارت اور وزیر مملکت برائے تجارت شامل ہیں۔

رندھیر جیسوال نے کہا، ’’ہندوستان-سنگاپور وزارتی گول میز اجلاس میں کئی شعبوں پر بات چیت ہوتی ہے، جن میں بنیادی طور پر جدید مینوفیکچرنگ، رابطہ کاری، ڈیجیٹل شعبے، صحت، طب، ہنرمندی کی ترقی اور پائیداری شامل ہیں۔‘‘ انہوں نے مزید کہا، ’’بات چیت کا مرکز ان شعبوں کے ذریعے دونوں ممالک کے درمیان دوطرفہ تعلقات کو مزید مضبوط بنانا ہے۔ میں یہ بھی کہنا چاہوں گا کہ یہ وہ شعبے ہیں جو ’وکست ہندوستان‘ (ترقی یافتہ ہندوستان) کے منصوبے کو نمایاں طور پر فروغ دیتے ہیں۔‘‘