نئی دہلی/ آواز دی وائس
بنگلہ دیش کی ایک عدالت نے جمعرات کو سابق وزیرِ اعظم شیخ حسینہ کو بدعنوانی کے تین مقدمات میں مجموعی طور پر 21 سال قید کی سزا سنائی ہے۔ یہ تینوں مقدمات پورباچول میں راجوک نیو ٹاؤن پروجیکٹ کے پلاٹ الاٹمنٹ میں مبینہ بے ضابطگیوں سے متعلق تھے۔
رپورٹ کے مطابق، شیخ حسینہ پر الزام تھا کہ انہیں بغیر کسی درخواست کے پلاٹ الاٹ کیا گیا اور یہ الاٹمنٹ قانونی اختیارِ عمل سے باہر ہو کر کیا گیا۔ شیخ حسینہ اس وقت ہندوستان میں موجود ہیں، اسی لیے عدالت نے یہ فیصلہ ان کی غیر موجودگی میں سنایا۔ ہر مقدمے میں عدالت نے حسینہ کو سات سات سال کی سزا دی، جو ملا کر 21 سال بنتی ہے۔
اسی ماہ موت کی سزا کا اعلان بھی ہوا تھا
اس سے پہلے اسی ماہ کے آغاز میں شیخ حسینہ کو انسانیت کے خلاف جرائم کے معاملے میں سزائے موت سنائی گئی تھی۔ ان پر الزام ہے کہ گزشتہ سال ہونے والی عوامی بغاوت کو سختی سے کچلا گیا تھا، جس کے بعد ان کی 15 سالہ حکومت کا خاتمہ ہوا تھا۔
شیخ حسینہ اور ان کی جماعت عوامی لیگ نے ان مقدمات کو سیاسی انتقام قرار دیا ہے۔ انہوں نے اپنے لیے کسی وکیل کی بھی تقرری نہیں کی، جبکہ بین الاقوامی انسانی حقوق تنظیموں نے بھی ان مقدمات کی شفافیت پر سوالات اٹھائے ہیں۔
