ماسکو/ آواز دی وائس
روس کے کامچاٹکا علاقے میں زلزلے کے شدید جھٹکے محسوس کیے گئے ہیں۔ ریکٹر اسکیل پر زلزلے کی شدت 7.1 ریکارڈ کی گئی۔ زلزلے کے بعد پیسفک سونامی وارننگ سسٹم نے ممکنہ سونامی کی اطلاع دی ہے اور اسے پورے خطے کے لیے بڑا خطرہ قرار دیا ہے۔ یہ کوئی پہلی بار نہیں ہے جب روس کے کامچاٹکا جزیرے میں اتنے طاقتور جھٹکے محسوس کیے گئے ہوں، اس سے پہلے بھی یہاں شدید زلزلے آ چکے ہیں۔
اس بار زلزلے کی گہرائی سمندر کی سطح سے صرف 10 کلومیٹر تھی، اسی وجہ سے لوگوں کو جھٹکے زیادہ تیز محسوس ہوئے۔ یہ وہی علاقہ ہے جہاں اس سے پہلے 8.8 شدت کا زلزلہ آ چکا ہے۔ 1952 میں تو کامچاٹکا میں 9.0 شدت کا زلزلہ آیا تھا، جس کے بعد سونامی نے پورے علاقے میں تباہی مچا دی تھی۔ چند دن قبل افغانستان میں بھی شدید زلزلہ آیا تھا جس میں 2000 سے زائد افراد جان سے ہاتھ دھو بیٹھے تھے۔
زلزلے کے لحاظ سے ہندوستان کو بھی حساس مانا جاتا ہے۔ لوگوں کے ذہن میں ہمیشہ یہ خوف رہتا ہے کہ کیا ملک کسی طاقتور زلزلے کا مقابلہ کر پائے گا یا نہیں؟ کون سا زلزلہ کتنا خطرناک ہو سکتا ہے؟ ہندوستان کا 59 فیصد حصہ زلزلے کے لحاظ سے حساس زون میں آتا ہے۔ یہاں نومبر 2024 سے فروری 2025 کے درمیان 159 زلزلے آ چکے ہیں۔ بیورو آف انڈین اسٹینڈرڈز نے ہندوستان کو زلزلے کے لحاظ سے 4 زونز میں تقسیم کیا ہے جنہیں سیسمک زون کہا جاتا ہے۔
زلزلے سے نمٹنے کے لیے اقدامات
اب ہندوستان کی تمام حکومتوں کو اس بات کا احساس ہے کہ ملک میں کسی وقت طاقتور زلزلہ آ سکتا ہے۔ اسی لیے کئی اقدامات کیے گئے ہیں۔ مثال کے طور پر 2014 تک اگر صرف 80 سیسمک آبزرویٹریز تھیں تو 2025 تک یہ تعداد بڑھ کر 168 ہو چکی ہے۔ اسی طرح پورے ملک میں ارتھ کوئیک ارلی وارننگ سسٹم شروع کرنے کی تیاری ہے۔ اتراکھنڈ میں تو سال 2021 میں ہی یہ سسٹم نافذ کیا جا چکا ہے، اور جو بھی اس کی فائنڈنگز ہوتی ہیں، وہ بھوڈیو ایپ پر بھیجی جاتی ہیں۔
اب ایک طرف ٹیکنالوجی کے ذریعے زلزلے کے خطرات سے بچنے کی کوشش ہو رہی ہے اور دوسری طرف عوام کو آگاہ کرنا بھی ضروری سمجھا جا رہا ہے۔ اسی وجہ سے این ڈی ایم اے نے اس سال مارچ میں ’’آفت کا سامنا‘‘ کے نام سے ایک آگاہی مہم شروع کی تھی جسے دوردرشن پر نشر کیا گیا۔ اسی طرح سال 2016 میں وزیرِاعظم مودی نے بھی زلزلے کی سنگینی کو سمجھتے ہوئے ایک 10 نکاتی ایجنڈا تیار کیا تھا۔ اس وقت 2047 تک ایک ترقی یافتہ ہندوستان بنانے کے لیے ان اقدامات کو ضروری سمجھا گیا تھا۔ اس فہرست میں ارلی وارننگ سسٹم کے آغاز سے لے کر انشورنس پالیسی میں بڑے بدلاؤ تک کے اقدامات شامل تھے۔
