ریاض: سعودی عرب کی امدادی ایجنسی کنگ سلمان ہیومنٹیرین ایڈ اینڈ ریلیف سینٹر (KSRelief) دنیا بھر میں اہم کردار ادا کر رہی ہے اور غریب و ضرورت مند لوگوں کو امداد فراہم کر رہی ہے۔

مملکت نے اب تک 173 ممالک میں 7 ہزار 983 منصوبے مکمل کیے ہیں اور 141 ارب ڈالر سے زیادہ کی انسانی و ترقیاتی امداد فراہم کی ہے۔

یہ بھی قابل ذکر ہے کہ سعودی عرب میں ہر سال 19 اگست کو عالمی یومِ انسانیت (ورلڈ ہیومنٹیرین ڈے) منایا جاتا ہے، جس کی ایک گہری تاریخی اہمیت ہے۔

ایس پی اے کے مطابق سعودی عرب کے وژن 2030 کے اہداف میں بین الاقوامی سطح پر ضرورت مند ممالک کو امداد فراہم کرنا بھی شامل ہے۔ اس کے علاوہ فلاحی و ترقیاتی منصوبے بھی اس امدادی مہم کا حصہ ہیں جو انسانی خدمت کے جذبے کے تحت انجام دیے جاتے ہیں۔

یہ مستقل عزم سعودی عرب کو دنیا کے سب سے بڑے عطیہ دینے والے ملکوں میں شامل کرتا ہے۔

کنگ سلمان ہیومنٹیرین ایڈ اینڈ ریلیف سینٹر نے اپنے قیام 13 مئی 2015 سے اب تک 108 ممالک میں 3 ہزار 612 منصوبے مکمل کیے ہیں، جن کی مالیت 8.14 ارب ڈالر ہے اور ان سے لاکھوں ضرورت مند افراد کو فائدہ پہنچا ہے۔

غزہ میں انسانی بحران کے خاتمے کے لیے سعودی امدادی ایجنسی نے فضائی اور بحری امدادی پل قائم کیے جن کے ذریعے 7 ہزار 180 ٹن سے زیادہ امداد اور 20 ایمبولینسیں فراہم کی گئیں۔

مزید برآں بین الاقوامی تنظیموں کے ساتھ 90.35 ملین ڈالر مالیت کے امدادی منصوبوں کے لیے معاہدے بھی کیے گئے۔