ریاض
سعودی عرب میں ایک رہائشی کمپلیکس پر ہونے والے میزائل حملے میں کسی بھی ہندوستانی شہری کی موت نہیں ہوئی۔ ریاض میں ہندوستانی سفارت خانے نے پیر کے روز یہ بات بتائی۔ سفارت خانے نے کہا کہ اتوار کو اس واقعے میں زخمی ہونے والے ایک ہندوستانی شہری کا سرکاری اسپتال میں علاج کیا جا رہا ہے۔
ہندوستانی سفارت خانے نے سوشل میڈیا پر ایک پوسٹ میں کہا كہ اطمینان کی بات ہے کہ کل شام الخرج میں پیش آنے والے اس افسوسناک واقعے میں کسی بھی ہندوستانی شہری کی جان نہیں گئی۔سفارت خانے نے مزید بتایا کہ وہ اس معاملے میں متعلقہ سعودی حکام کے رابطے میں ہے۔ بیان میں کہا گیا کہ زخمی شخص کا الخرج کے ایک سرکاری اسپتال میں علاج جاری ہے۔
اس سے قبل اتوار کے روز “سعودی سول ڈیفنس” نے بتایا تھا کہ الخرج میں ایک کمپنی کے رہائشی کمپلیکس پر میزائل گرنے سے دو افراد ہلاک ہو گئے۔ ان میں ایک ہندوستانی شہری بھی شامل بتایا گیا تھا۔ اس کے مطابق اس واقعے میں ایک بنگلہ دیشی شہری کی بھی موت ہوئی جبکہ 12 افراد زخمی ہوئے تھے۔ تاہم سعودی حکام نے مرنے والوں کی شناخت جاری نہیں کی تھی۔
دوسری جانب، سعودی عرب نے پیر کو ایران کو خبردار کیا کہ اگر وہ عرب ممالک پر حملے جاری رکھتا ہے تو اسے اب تک کا سب سے بڑا نقصان اٹھانا پڑ سکتا ہے۔ سعودی عرب کا یہ بیان اس نئے ڈرون حملے کے بعد سامنے آیا ہے جس میں بظاہر اس کے بڑے شیبہ تیل کے میدان کو نشانہ بنایا گیا۔
سعودی عرب نے ایران کے صدر مسعود پزشکیان کے اس بیان کو بھی مسترد کر دیا جس میں انہوں نے ہفتے کے روز کہا تھا کہ ایران نے خلیجی عرب ممالک پر اپنے حملے روک دیے ہیں۔
سعودی وزارتِ خارجہ نے ایک بیان میں کہا كہ ملک اس بات کی تصدیق کرتا ہے کہ ایرانی فریق نے اس بیان پر عمل نہیں کیا، نہ صدر کی تقریر کے دوران اور نہ ہی اس کے بعد۔ ایران نے بغیر کسی ٹھوس وجہ کے اپنی جارحیت جاری رکھی ہے۔
بیان میں مزید کہا گیا کہ ایرانی حملوں کا مطلب ہے خطے میں کشیدگی میں مزید اضافہ، جس کے موجودہ اور مستقبل میں تعلقات پر سنگین اثرات مرتب ہو سکتے ہیں۔مغربی ایشیا میں بڑھتے ہوئے تنازع کی وجہ سے دنیا بھر میں خام تیل کی قیمتوں میں تیزی سے اضافہ ہوا ہے۔ اسی دوران امریکہ کے صدر ڈونلڈ ٹرمپ نے کہا ہے کہ اگر اس سے ایران کے جوہری ہتھیاروں کے خطرے کو ختم کرنے میں مدد ملتی ہے تو تیل کی قیمتوں میں یہ “عارضی اضافہ” قابلِ قبول ہے۔
.gif)
