ریاض/لندن: انسانی حقوق کی تنظیم ایمنسٹی انٹرنیشنل نے پیر کے روز گہری تشویش کا اظہار کیا ہے کہ سعودی عرب میں سزائے موت دینے کے واقعات میں پچھلے سال غیر معمولی اضافہ دیکھا گیا ہے، خاص طور پر غیر پرتشدد منشیات سے متعلق معاملات میں۔

ایمنسٹی کے مطابق، گزشتہ سال سعودی عرب میں 345 افراد کو پھانسی دی گئی، جو گزشتہ تین دہائیوں میں ریکارڈ کی گئی سب سے زیادہ تعداد ہے۔ صرف 2025 کی پہلی ششماہی (جنوری تا جون) میں ہی 180 افراد کو سزائے موت دی جا چکی ہے، جس سے اندازہ لگایا جا رہا ہے کہ یہ ریکارڈ اس سال دوبارہ ٹوٹ سکتا ہے۔

انسانی حقوق کی ایک اور تنظیم رپریو کے مطابق، جن افراد کو رواں سال سزائے موت دی گئی، ان میں سے تقریباً دو تہائی افراد غیر پرتشدد منشیات کے مقدمات میں ملوث تھے۔ ایمنسٹی انٹرنیشنل نے بھی ایسے مقدمات میں موت کی سزا کے استعمال کو غیر منصفانہ اور تشویشناک قرار دیا ہے۔

نیوز ایجنسی ایسوسی ایٹڈ پریس کے مطابق جب سعودی حکام سے سزائے موت کے اس بڑھتے استعمال پر سوال کیا گیا تو کوئی جواب نہیں دیا گیا۔ حکومت کی جانب سے یہ بھی واضح نہیں کیا گیا کہ غیر پرتشدد جرائم میں اس قدر زیادہ موت کی سزا کیوں دی جا رہی ہے۔ یہ اضافہ اس بیان کے بالکل برعکس ہے جو 2022 میں سعودی عرب کے ولی عہد محمد بن سلمان نے دیا تھا۔

انہوں نے ’دی اٹلانٹک‘ کو انٹرویو میں کہا تھا: جہاں تک سزائے موت کا تعلق ہے، ہم نے اسے ختم کر دیا ہے، سوائے ایک زمرے (نشیلی اشیاء) کے، کیونکہ قرآن میں اس کی واضح ہدایت ہے۔ لہٰذا ہم اس پر کچھ نہیں کر سکتے، چاہے جو ہو۔ کیونکہ یہ قرآن کی سیدھی تعلیم ہے۔ سعودی عرب میں سزائے موت کے استعمال میں اضافہ، خاص طور پر ان معاملات میں جن میں تشدد شامل نہیں، بین الاقوامی انسانی حقوق کے اصولوں کے خلاف تصور کیا جا رہا ہے۔

ایمنسٹی انٹرنیشنل اور رپریو جیسی تنظیمیں سعودی عرب سے مطالبہ کر رہی ہیں کہ وہ موت کی سزا پر نظرِثانی کرے اور انسانی وقار اور شفاف عدالتی عمل کو یقینی بنائے۔