ریاض: سعودی عرب نے جمعرات کے روز مشرقی یروشلم میں واقع مسجد اقصیٰ میں اسرائیلی حکام کی ’’اشتعال انگیز‘‘ کارروائیوں کی سخت مذمت کی ہے۔

سعودی وزارت خارجہ نے اپنے بیان میں کہا کہ مملکت ’’اسرائیلی قابض حکام کے عہدیداروں کی جانب سے مسجد اقصیٰ کے خلاف بار بار کی جانے والی اشتعال انگیز کارروائیوں‘‘ کی شدید مذمت کرتی ہے۔ بیان میں کہا گیا کہ تازہ واقعے میں اسرائیلی قابض حکام کے ایک عہدیدار نے پولیس کی حفاظت میں مسجد اقصیٰ کے احاطے میں داخلہ کیا جبکہ ایک دوسرے عہدیدار نے مسجد اقصیٰ کے صحن میں اسرائیلی پرچم لہرایا۔

اس سے قبل جمعرات کو اسرائیل کے انتہائی دائیں بازو سے تعلق رکھنے والے قومی سلامتی کے وزیر اتمار بن گویر نے مسجد اقصیٰ کے احاطے میں داخل ہو کر اشتعال انگیزی کی۔ یہ واقعہ اس وقت پیش آیا جب ہزاروں یہودی قوم پرست ’’یومِ یروشلم‘‘ کے موقع پر قدیم شہر کی گلیوں میں مارچ کر رہے تھے۔ یہ دن 1967 کی جنگ میں اسرائیل کی جانب سے مشرقی یروشلم پر قبضے کی یاد میں منایا جاتا ہے۔

بدھ کے روز نیگیو گلیل اور قومی استحکام کے وزیر یتزحاک واسرلاف نے بھی قوم پرستانہ تقریب سے قبل مسجد اقصیٰ کا دورہ کیا تھا۔ انہوں نے کہا کہ بن گویر اس مقدس مقام پر ایک ’’انقلاب‘‘ کی قیادت کر رہے ہیں۔ دونوں وزراء انتہائی دائیں بازو کی اوتزما یہودیت یعنی ’’یہودی طاقت‘‘ پارٹی سے تعلق رکھتے ہیں۔

سعودی وزارت خارجہ نے اپنے بیان میں مزید کہا کہ مملکت القدس اور اس کے مقدس مقامات کی تاریخی اور قانونی حیثیت کو نقصان پہنچانے والے تمام اقدامات کو مکمل طور پر مسترد کرتی ہے۔

بیان میں عالمی برادری سے مطالبہ کیا گیا کہ وہ بین الاقوامی قوانین اور اصولوں کی خلاف ورزی کرنے والی ایسی کارروائیوں کو روکے اور فلسطین میں اسلامی مقدس مقامات اور بے گناہ شہریوں کے خلاف اسرائیلی قابض حکام کی مسلسل سنگین خلاف ورزیوں کا محاسبہ کرے۔