ماسکو: روس میں ایک 19 سالہ نوجوان کو سوشل میڈیا پر افغان طالبان کے بارے میں توہین آمیز تبصرہ کرنے پر عدالت کی جانب سے 10 ہزار روبل (تقریباً 103 پاؤنڈ) جرمانہ عائد کیا گیا ہے۔

یہ واقعہ ایسے وقت پیش آیا ہے جب روس افغانستان میں برسرِ اقتدار طالبان حکومت کے ساتھ اپنے سفارتی اور تجارتی تعلقات کو مزید مضبوط بنانے کی کوشش کر رہا ہے۔

روسی خبر رساں اداروں کے مطابق روستوف آن ڈان کی ایک عدالت نے 5 جون کو یگور نامی نوجوان کے خلاف فیصلہ سنایا۔ بتایا گیا ہے کہ اس نے روسی سوشل میڈیا پلیٹ فارم "وی کے" (VK) پر ایک پوسٹ کے نیچے تبصرہ کیا تھا جس میں طالبان اور روس کے درمیان تجارتی روابط کا ذکر کیا گیا تھا۔

اصل پوسٹ میں کہا گیا تھا کہ طالبان روس کو گرینیڈز، کشمش، کوکاکولا، قالین اور کپاس فراہم کریں گے۔ اس پر ردِعمل دیتے ہوئے نوجوان نے طالبان کے بارے میں توہین آمیز الفاظ استعمال کیے اور سوال اٹھایا کہ وہ روس میں کیا کر رہے ہیں۔

عدالت نے قرار دیا کہ یہ تبصرہ نسلی اور قومی بنیادوں پر نفرت انگیزی کے زمرے میں آتا ہے۔ استغاثہ نے نوجوان کی دو دیگر سوشل میڈیا پوسٹس کی بھی نشاندہی کی جن میں اس نے تارکین وطن کے خلاف تشدد پر مبنی خیالات کا اظہار کیا تھا۔رپورٹس کے مطابق ملزم نے عدالت میں اپنے فعل کا اعتراف کیا اور اس پر ندامت کا اظہار بھی کیا، جس کے بعد اسے جرمانے کی سزا سنائی گئی۔

واضح رہے کہ روس نے حالیہ برسوں میں طالبان کے ساتھ تعلقات میں نمایاں بہتری پیدا کی ہے۔ روسی سپریم کورٹ نے گزشتہ سال طالبان کو دہشت گرد تنظیموں کی فہرست سے خارج کر دیا تھا۔ اس سے قبل 2003 میں طالبان کو دہشت گرد تنظیم قرار دیا گیا تھا اور ان کے ساتھ کسی بھی قسم کے روابط قانونی طور پر ممنوع تھے۔

اس فیصلے کے بعد روسی حکام نے افغانستان میں استحکام اور علاقائی تعاون کے لیے طالبان کے ساتھ روابط بڑھانے پر زور دیا ہے۔ اسی سلسلے میں طالبان کے نمائندوں کو روس میں مختلف بین الاقوامی فورمز اور کانفرنسوں میں مدعو کیا جا رہا ہے۔

مئی میں افغان وزیر دفاع ملا محمد یعقوب نے ماسکو کا دورہ کیا، جہاں انہوں نے بین الاقوامی سلامتی فورم میں شرکت کی اور روس کے ساتھ سوویت دور کے افغان فوجی سازوسامان کی مرمت اور بحالی سے متعلق ایک معاہدے پر دستخط کیے۔

روسی سفیر دیمتری زرنوف کے مطابق دونوں ممالک کے درمیان تجارتی سرگرمیوں میں بھی اضافہ ہو رہا ہے اور افغانستان روس کو سافٹ ڈرنکس، مصالحہ جات، خشک میوہ جات اور دیگر مصنوعات برآمد کر رہا ہے۔

مبصرین کے مطابق یہ واقعہ اس بات کی عکاسی کرتا ہے کہ روس میں طالبان کے بارے میں سرکاری پالیسی میں آنے والی تبدیلیوں کے ساتھ ساتھ عوامی سطح پر اظہارِ رائے سے متعلق حساسیت بھی بڑھتی جا رہی ہے۔