ماسکو: روس کی سرکاری خبر رساں ایجنسی تاس نے بدھ کو کہا کہ ماسکو نے یوکرین میں اپنی تمام سفارتی تنصیبات سے اہلکاروں کو نکالنا شروع کر دیا ہے۔ ماسکو کا کیف میں اپنا سفارت خانہ اور خارکیو، اوڈیسا اور لیویو میں قونصل خانے ہیں۔

 روس اور یوکرین کے درمیان کشیدگی بڑھتی جا رہی ہے۔ ادھر امریکی صدر جو بائیڈن نے پابندیوں کا اعلان کیا ہے۔

روس کے دو مالیاتی اداروں پر پابندیوں کا اعلان کرتے ہوئے صدر بائیڈن نے کہا کہ روس اب مغربی ممالک کے ساتھ تجارت نہیں کر سکے گا۔ ہمیں کئی اقدامات کرنے ہیں۔

انہوں نے کہا کہ ہم دونوں ممالک کے درمیان جاری تنازع کو حل کرنے کی کوشش جاری رکھیں گے۔

اسی دوران روسی وزارت خارجہ نے کہا کہ اس نے یوکرین سے اپنے سفارتی عملے کو نکالنے کا فیصلہ کیا ہے۔

وزارت نے منگل کو کہا کہ یوکرین میں روسی سفارت کاروں کو متعدد دھمکیاں موصول ہوئی ہیں اور سفارتی عملے کو "بہت جلد" نکال لیا جائے گا۔

اس فیصلے سے قبل روس نے یوکرین کے باغی علاقوں کی آزادی کو تسلیم کیا تھا اور روسی پارلیمنٹ نے روسی صدر ولادیمیر پیوٹن کو یوکرین میں فوجی دستوں کے استعمال کی منظوری دے دی تھی۔