نئی دہلی: مغربی ایشیا میں بڑھتی کشیدگی کے درمیان بین الاقوامی بازار میں خام تیل کی قیمت 100 ڈالر فی بیرل کے قریب پہنچنے سے ہندوستان کے تیل درآمدی بل، روپے کی قدر اور مہنگائی پر دباؤ بڑھنے کا خدشہ ہے۔ بین الاقوامی معیار برینٹ کروڈ کی قیمت 2 فیصد سے زیادہ بڑھ کر تقریباً 99 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (WTI) کی قیمت تقریباً 3 فیصد اضافے کے ساتھ 94 ڈالر فی بیرل تک پہنچ گئی۔ ہندوستان دنیا کا تیسرا سب سے بڑا خام تیل درآمد کرنے والا اور استعمال کرنے والا ملک ہے اور اپنی ضرورت کا 88 فیصد سے زیادہ خام تیل درآمد کرتا ہے۔

ایسے میں بین الاقوامی قیمتوں میں طویل عرصے تک اضافے سے ملک کا ڈالر میں خام تیل درآمد کرنے کا بل بڑھ سکتا ہے، جس سے تجارتی توازن اور روپے پر دباؤ پڑنے کا خدشہ ہے۔ خام تیل کی بلند قیمتوں کا اثر ایندھن، نقل و حمل اور دیگر توانائی کی لاگت کے ذریعے ملکی مہنگائی پر بھی پڑ سکتا ہے۔

پٹرولیم وزارت کے پٹرولیم پلاننگ اینڈ اینالیسس سیل (PPAC) کے مطابق اپریل سے جولائی کے دوران ہندوستان کا خام تیل درآمد کرنے کا بل 56 فیصد سے زیادہ بڑھ کر 63.4 ارب ڈالر ہوگیا، جبکہ گزشتہ سال اسی مدت میں یہ 40.5 ارب ڈالر تھا۔ PPAC کے مطابق ستمبر میں ہندوستان کے خام تیل کی درآمد کی اوسط قیمت 100.75 ڈالر فی بیرل تک پہنچ گئی ہے، جو اگست میں 90.19 ڈالر اور جولائی میں 82.04 ڈالر فی بیرل تھی۔ 7 ستمبر کو یہ قیمت 106.26 ڈالر فی بیرل رہی۔ ریٹنگ ایجنسی اکارا لمیٹڈ کے سینئر نائب صدر اور کارپوریٹ ریٹنگز کے شریک گروپ سربراہ پرشانت وششٹھ نے کہا، ’’ایران اور امریکہ کے درمیان کشیدگی دوبارہ بڑھنے سے آبنائے ہرمز کے راستے آنے والی محدود خام تیل کی سپلائی کو خطرہ لاحق ہوگیا ہے۔

ایران کی جانب سے آبنائے ہرمز سے آگے ایک نیا ممنوعہ سمندری علاقہ بنانے کی دھمکی سے اضافی توانائی کی سپلائی بھی خطرے میں پڑ سکتی ہے۔‘‘ انہوں نے کہا کہ خام تیل کی قیمتوں میں حالیہ اضافے سے گاڑیوں کے ایندھن کی فروخت کرنے والی کمپنیوں کا مارجن منفی ہوسکتا ہے، جبکہ گھریلو ایل پی جی کو لاگت سے کم قیمت پر فروخت کرنے کا موجودہ تقریباً 200 روپے فی سلنڈر کا بوجھ بھی بڑھ سکتا ہے۔ فی الحال پٹرول اور ڈیزل کی خوردہ قیمتیں تین ماہ سے زیادہ عرصے سے مستحکم ہیں۔ ان کی قیمتوں میں آخری مرتبہ 25 مئی کو اضافہ کیا گیا تھا۔ خام تیل کی قیمتوں میں اضافے سے سرکاری شعبے کی پٹرولیم کمپنیوں کے منافع کے مارجن پر بھی دباؤ بڑھ سکتا ہے۔ یہ کمپنیاں پہلے ہی اس وجہ سے نقصان سے دوچار ہیں کہ وہ بین الاقوامی قیمتوں میں گزشتہ اضافے کا پورا بوجھ صارفین پر منتقل نہیں کر پائی ہیں۔

دریں اثنا، مغربی ایشیا میں جاری تنازع کے باعث عالمی تیل سپلائی کے لیے اہم آبنائے ہرمز سے آمدورفت سست ہوگئی ہے۔ عام طور پر دنیا کی خام تیل اور مائع قدرتی گیس (LNG) کی سپلائی کا تقریباً پانچواں حصہ اسی راستے سے گزرتا ہے۔ تنازع کے دوران مغربی ایشیا سے تیل کی سپلائی کم ہوکر تقریباً 1.1 کروڑ بیرل یومیہ رہ گئی ہے، جبکہ پہلے یہ تقریباً 1.8 کروڑ بیرل یومیہ تھی۔ توانائی کی تحقیق اور مشاورتی کمپنی وڈ میکینزی کے مطابق اگر مغربی ایشیا کا تنازع سال کے آخر تک جاری رہتا ہے تو اکتوبر سے دسمبر کی سہ ماہی میں عالمی سطح پر خام تیل کی ریفائننگ تقریباً 14 لاکھ بیرل یومیہ کم ہوسکتی ہے، جس میں سب سے زیادہ کمی ایشیا میں متوقع ہے۔