اسلام آباد: وزیر دفاع خواجہ آصف نے کہا ہے کہ ہندوستان کے بیانات واضح نشاندہی کرتے ہیں کہ وہ دوبارہ کوئی ایڈونچر کرنے کا ارادہ رکھتا ہے اور اگر ایسا ہوا تو اسے پہلے سے کہیں زیادہ منہ توڑ جواب دیا جائے گا۔ سیالکوٹ میں جیو نیوز سے گفتگو کے دوران خواجہ آصف نے کہا کہ ہندوستان نے جو ذلت اٹھائی تھی اسے اپنی کھوئی ہوئی عزت بحال کرنے کے لیے یہ اقدام اٹھانا پڑے گا۔
ان کا کہنا تھا کہ ہندوستان کی جو خوش فہمی یا غلط فہمی تھی وہ رفع ہو چکی ہے۔ خواجہ آصف نے مزید کہا کہ ان کے ساتھ ہوٹل کی لابی میں ایک خاتون کے ساتھ تصویر بنائی گئی تھی جسے وہ نہیں جانتے۔ وزیر دفاع نے افغانستان سے تعلقات کے بارے میں کہا کہ تعلقات بگڑنے کی طرف جا رہے ہیں، پہلے بھی یہ تعلقات مثالی نہیں تھے۔
ان کا کہنا تھا کہ افغانستان پاکستان میں دہشت گردی ایکسپورٹ کر رہا ہے اور ایسی فضا میں تعلقات میں مزید خرابی ہماری خواہش نہیں۔ انہوں نے کہا کہ ہم اچھے ہمسائے کی طرح باوقار تعلقات چاہتے ہیں۔ خواجہ آصف نے کہا کہ پاکستان کے وہ علاقے جہاں دہشت گرد پناہ لیتے ہیں، وہاں کے مکینوں کو اس بات کا علم ہوتا ہے۔ اگر محلے میں کوئی باہر سے آئے تو مجھے تیسرے دن تک اس کا پتہ چل جائے گا۔ انہوں نے خبردار کیا کہ اگر ان علاقوں کے لوگ خاموش رہیں تو یہ نیم رضا مندی سمجھی جائے گی اور پاکستان کے محبِ وطن شہریوں کو کوئی نقصان نہیں ہونے دیا جائے گا۔
