مینی ایپولس:امریکہ کے صدر ڈونلڈ ٹرمپ کی انتظامیہ نے ایک نیا حکم نامہ جاری کیا ہے جس کے تحت ملک میں موجود اُن ہزاروں پناہ گزینوں کو حراست میں لیا جا سکتا ہے جو یہاں قانونی طور پر مقیم ہیں لیکن ابھی تک انہیں مستقل رہائش حاصل نہیں ہوئی۔

مِنّی سوٹا میں جمعرات کو ہونے والی وفاقی عدالت کی سماعت سے قبل محکمہ داخلی سلامتی (ڈی ایچ ایس) کی جانب سے جمع کرائے گئے ایک میمو میں کہا گیا ہے کہ ‘گرین کارڈ’ کے لیے درخواست دینے والے پناہ گزینوں کو، امریکہ میں داخلے کے ایک سال بعد، اپنی درخواستوں کی جانچ پڑتال کے دوران وفاقی حراست میں رہنا ہوگا۔

بدھ کو جمع کرائے گئے میمو میں کہا گیا ہے کہ ڈی ایچ ایس “معائنہ اور تفتیش کے عمل کی مدت کے لیے تارکینِ وطن کو حراست میں رکھ سکتا ہے۔” انسانی حقوق کے کارکنوں اور آبادکاری کے گروپوں نے اس حکم کی سخت مذمت کی ہے، اور امکان ہے کہ اسے قانونی چیلنجز کا سامنا کرنا پڑے گا۔ اس اقدام سے سابق صدر جو بائیڈن کی انتظامیہ کے دوران امریکہ آنے والے تقریباً دو لاکھ پناہ گزینوں میں خوف اور بے یقینی پیدا ہو سکتی ہے۔

یہ حکم ٹرمپ انتظامیہ کی جانب سے امیگریشن پابندیوں کے سلسلے میں تازہ ترین اقدام ہے۔ گزشتہ سال کے آخر میں ‘ایسوسی ایٹڈ پریس’ (اے پی) کو موصول ہونے والے ایک میمو میں کہا گیا تھا کہ ٹرمپ انتظامیہ بائیڈن دور میں امریکہ آنے والے تمام پناہ گزینوں کا ازسرِ نو جائزہ لینے کا ارادہ رکھتی ہے، اور بائیڈن کے دور میں آنے والوں کے لیے ‘گرین کارڈ’ کی منظوری فوری طور پر معطل کر دی گئی تھی۔ انتظامیہ نے پالیسی میں اس تبدیلی کے لیے قومی سلامتی اور معاشی خدشات کا حوالہ دیا ہے، تاہم ماہرین کا کہنا ہے کہ امریکہ میں داخل ہونے والے پناہ گزینوں کی پہلے ہی جامع جانچ پڑتال کی جاتی ہے۔