کینبرا/ آواز دی وائس
وزیر دفاع راج ناتھ سنگھ نے جمعرات کو اپنے دورے کے دوران آسٹریلیا کے وزیر اعظم انتھونی البانیز سے ملاقات کی اور دو طرفہ تعلقات میں بہتری کی تعریف کی۔ انہوں نے ایکس پر کہا کہ کینبرا میں آسٹریلیا کے وزیر اعظم معزز انتھونی البانیز سے بہترین ملاقات ہوئی۔ انہوں نے ہندوستان کے ساتھ اپنے گہرے تعلقات کو یاد کیا۔ مجھے یقین ہے کہ ہندوستان-آسٹریلیا کے دو طرفہ تعلقات مزید گہرے اور مضبوط ہوتے رہیں گے۔
راج ناتھ سنگھ سے ملاقات کے دوران، آسٹریلیا کے وزیر اعظم نے زور دیا کہ ہندوستان اور آسٹریلیا کی دفاعی شراکت داری اعتماد، مشترکہ مفادات، اور ایک پرامن، محفوظ اور خوشحال انڈو-پیسیفک کے عزم پر مبنی ہے۔ انہوں نے سنگھ سے ملاقات پر خوشی کا اظہار کیا اور ایکس پر کہا ک ہہندوستان اور آسٹریلیا کی دفاعی شراکت داری مسلسل مضبوط ہو رہی ہے اعتماد، مشترکہ مفادات اور ایک پرامن، محفوظ اور خوشحال انڈو-پیسیفک کے عزم پر مبنی۔ وزیر دفاع راج ناتھ سنگھ سے ان کے آسٹریلیا کے پہلے دورے میں افتتاحی آسٹریلیا ہندوستان دفاعی وزراء کے مکالمے کے موقع پر ملاقات کرنا بہت خوشی کی بات ہے۔
اس سے قبل، راج ناتھ سنگھ نے آسٹریلیا کے نائب وزیر اعظم اور وزیر دفاع رچرڈ مارلس کے ساتھ ایک نتیجہ خیز ملاقات کی۔ رہنماؤں نے ہندوستان-آسٹریلیا دفاعی تعاون کے مکمل شعبوں کا جائزہ لیا، جن میں دفاعی صنعت، سائبر دفاع، سمندری سلامتی اور خطے کے چیلنجز شامل ہیں۔
ہندوستان کی دفاعی صنعت کی تیز رفتار ترقی اور عالمی سطح پر اعلیٰ معیار کی دفاعی ٹیکنالوجی کے قابل اعتبار ذریعہ کے طور پر ہندوستان کی بڑھتی ہوئی حیثیت کو نوٹ کرتے ہوئے، سنگھ نے کہا کہ انہوں نے ہندوستان اور آسٹریلیا کے درمیان دفاعی صنعت کی شراکت داری کے مزید امکانات پر تبادلۂ خیال کیا۔
وزیر دفاع کے دورے کے دوران ہندوستان اور آسٹریلیا نے اہم دفاعی معاہدے بھی کیے۔ آسٹریلیا کے نائب وزیر اعظم اور وزیر دفاع رچرڈ مارلس نے ہندوستان کے ساتھ نئے طے پانے والے دفاعی معاہدے کو دونوں ممالک کی مسلح افواج کے درمیان عملی شراکت داری کو مضبوط کرنے کے لیے ’’انتہائی اہم قدم‘‘ قرار دیا۔
مارلس نے کہا کہ میرے خیال میں آج کی اہمیت یہ ہے کہ جس طرح ہم گہرے اعتماد اور اسٹریٹجک ہم آہنگی دیکھ رہے ہیں، وہ اب ہماری دونوں دفاعی افواج کے درمیان عملی سطح پر بھی زیادہ مضبوط انداز میں ظاہر ہو رہی ہے۔ ہمارے آپریشنل کمانڈز کے درمیان اسٹاف ٹاکس کے حوالے سے معاہدہ انتہائی اہم ہے… ہم اس پر بہت پرجوش ہیں۔ راج ناتھ سنگھ جمعرات کو کینبرا پہنچے، اور ان کا یہ سرکاری دورہ دونوں ممالک کے درمیان دفاعی اور اسٹریٹجک تعاون کو مضبوط بنانے کے لیے ہے۔
