علی گڑھ (یوپی) (پی ٹی آئی) اتر پردیش کے وزیر اعلیٰ یوگی آدتیہ ناتھ نے منگل کے روز دعویٰ کیا کہ بھارت میں غیر ملکی کمپنیوں کی جانب سے مال فروخت کرکے حاصل کیے جانے والے منافع کو دہشت گردی، نکسل ازم، مذہب کی تبدیلی، اور 'لو جہاد' جیسے رجحانات کی مالی امداد کے لیے استعمال کیا جا رہا ہے۔انہوں نے عوام سے اپیل کی کہ وہ وزیر اعظم نریندر مودی کی 'ووکل فار لوکل' (مقامی مصنوعات کی حمایت) مہم کو اپنائیں تاکہ مقامی مصنوعات اور ہنر مندوں کو فروغ حاصل ہو۔

علی گڑھ میں ایک عوامی اجتماع سے خطاب کرتے ہوئے آدتیہ ناتھ نے کہا کہ اگر ہمارا پیسہ ہمارے ہنر مندوں اور کاریگروں کے پاس جاتا ہے، تو وہ ترقی اور خوشحالی کی بنیاد بنتا ہے۔ لیکن اگر یہی پیسہ غیر ملکی ہاتھوں میں جاتا ہے، تو وہ منافع بھارت کے خلاف استعمال ہوتا ہے — دہشت گردی، مذہب کی تبدیلی، اور دھماکوں کی صورت میں تاکہ ملک کو غیر مستحکم کیا جا سکے۔ اسی لیے آج 'سودیشی' کی ضرورت ہے۔یوگی آدتیہ ناتھ کے یہ بیانات وزیر اعظم مودی کی اس تقریر کے کچھ دن بعد سامنے آئے ہیں جو انہوں نے 2 اگست کو وارانسی میں کی تھی، جس میں انہوں نے مقامی مصنوعات کو ترجیح دینے اور کچھ ممالک (جیسے امریکہ) کی جانب سے بھارتی مصنوعات پر عائد بھاری محصولات کا ذکر کیا تھا۔

 انہوں نے بتایا کہ 2018 میں وزیر اعظم مودی نے اتر پردیش اور تمل ناڈو میں دفاعی راہداریاں بنانے کا اعلان کیا تھا، جن میں علی گڑھ ایک اہم مقام کے طور پر منتخب کیا گیا تھا۔ 2018-19 سے علی گڑھ میں دفاعی ساز و سامان کی تیاری شروع ہو چکی ہے۔اس موقع پر انہوں نے سابق وزیر اعلیٰ کلیان سنگھ کو بھی یاد کیا اور کہا کہ کلیان سنگھ نے علی گڑھ کو قومی سطح پر ایک نئی پہچان دی۔ انہوں نے اسے "لاک سٹی" بنانے اور ترقی دینے کے لیے بنیاد رکھی۔یوگی آدتیہ ناتھ نے کہا کہ علی گڑھ میں مجاہد آزادی راجا مہندر پرتاپ سنگھ کے نام پر قائم کیا گیا ریاستی یونیورسٹی اعلیٰ تعلیم اور پہچان کے مرکز کے طور پر اہم کردار ادا کرے گا۔

جب منافع غیر ملکی ہاتھوں میں جاتا ہے، تو وہی پیسہ دہشت گردی، نکسل ازم، مذہبی تبدیلی اور لو جہاد کو فروغ دیتا ہے۔ ہم نے یہ آزادی سے پہلے بھی دیکھا ہے اور آج بھی دیکھ رہے ہیں۔ اسی لیے جب وزیر اعظم 'سودیشی' کی بات کرتے ہیں، تو وہ ہماری قومی تحریک ہونی چاہیے۔انہوں نے عوام سے اپیل کی کہ راکھی، جنم اشٹمی، گاندھی جینتی، دسہرہ اور دیوالی جیسے تہواروں کے دوران بھی مقامی مصنوعات کا استعمال کریں تاکہ مہاتما گاندھی کے تصور کو دوبارہ زندہ کیا جا سکے۔آدتیہ ناتھ نے "آپریشن سندور" کا حوالہ دیتے ہوئے کہا کہ اس میں استعمال ہونے والا برہموس میزائل اب اتر پردیش میں بھی تیار کیا جا رہا ہے۔برہموس میزائل جیسا کوئی اور ہتھیار دنیا میں نہیں ہے، اور اس کی طاقت نے پاکستان سمیت بھارت کے تمام دشمنوں کو خوفزدہ کر دیا ہے۔