نئی دہلی: وزیر اعظم نریندر مودی ہفتے سے شروع ہونے والے چار روزہ غیر ملکی دورے کے تحت ازبکستان جائیں گے، جہاں وہ دو طرفہ تعلقات کو مزید مضبوط بنانے کے لیے بات چیت کریں گے۔ اس کے بعد وہ شنگھائی تعاون تنظیم (ایس سی او) کے سالانہ سربراہ اجلاس میں شرکت کے لیے کرغزستان جائیں گے۔

وزارت خارجہ نے بتایا کہ دورے کے پہلے مرحلے میں مودی 29 اور 30 اگست کو ازبکستان کا دورہ کریں گے، جہاں وہ مختلف شعبوں میں دو طرفہ تعلقات کو مزید مستحکم کرنے کے طریقوں پر تبادلہ خیال کریں گے۔ وزارت نے کہا کہ وزیر اعظم ازبکستان کے بعد کرغزستان کے دارالحکومت بشکیک جائیں گے، جہاں وہ ایس سی او سربراہ اجلاس میں شرکت کریں گے۔

توقع ہے کہ اس اجلاس میں خطے کی بدلتی ہوئی سلامتی کی صورتحال پر تفصیلی تبادلہ خیال کیا جائے گا۔ وزارت خارجہ میں سکریٹری (مغرب) سبی جارج نے پریس کانفرنس میں کہا کہ ایس سی او کا قیام بنیادی طور پر دہشت گردی، علیحدگی پسندی اور انتہا پسندی سے نمٹنے کے مقصد سے کیا گیا تھا، جو آج بھی چیلنجز بنے ہوئے ہیں۔