واشنگٹن۔تہران۔ تل ابیب

ایران اسرائیل جنگ: امریکہ ایران اسرائیل جنگ میں کودنے کے لیے پوری طرح تیار ہے۔ امریکی صدر ڈونلڈ ٹرمپ نے منگل کی رات دیر گئے اپنے سینئر ساتھیوں کو بتایا کہ انھوں نے ایران کے خلاف حملے کے منصوبے کی منظوری دے دی ہے، لیکن حتمی حکم کو روک دیا ہے کہ آیا تہران اپنا جوہری پروگرام ترک کر دے گا۔ یعنی ٹرمپ حملے کا منصوبہ اسی صورت میں روکیں گے جب ایرانی حکومت اپنا جوہری پروگرام بند کر دے، ورنہ امریکہ اسرائیل کی جانب سے ایران کے خلاف جنگ میں شامل ہو جائے گا۔ وال اسٹریٹ جرنل نے بدھ کو ٹرمپ کے فیصلے سے واقف تین افراد کے حوالے سے یہ رپورٹ شائع کی

 صدر ڈونلڈ ٹرمپ نے اسرائیل اور ایران کے درمیان جاری جنگ میں امریکہ کی براہِ راست مداخلت کے حوالے سے متضاد اشارے دینا جاری رکھے ہیں، جہاں گزشتہ چھ دنوں سے شدید بمباری ہو رہی ہے۔بدھ کی صبح انہوں نے وائٹ ہاؤس کے لان میں دو دیوقامت جھنڈوں کے کھمبے نصب کیے، جن کی اونچائی 88 فٹ (27 میٹر) تھی۔اسی دوران جب ان سے مشرقِ وسطیٰ میں جاری کشیدگی کے بارے میں سوال کیا گیا کہ آیا امریکہ اسرائیل کے ساتھ مل کر ایران کی جوہری تنصیبات پر حملہ کرے گا یا نہیں، تو صدر ٹرمپ نے کہا کہ آپ نہیں جانتے کہ میں یہ کرنے والا ہوں یا نہیں۔ ہو سکتا ہے کروں، ہو سکتا ہے نہ کروں۔ کوئی نہیں جانتا کہ میں کیا کرنے والا ہوں۔ میں صرف یہ بتا سکتا ہوں کہ ایران مشکلات میں ہے اور وہ مذاکرات چاہتا ہے

۔بعد ازاں جب وہ اوول آفس میں اٹلی کے معروف فٹبال کلب ’یونٹس‘ کے کھلاڑیوں کے ساتھ تصاویر کھنچوا رہے تھے تو بھی انہوں نے یہی تاثر دیا کہ انہوں نے ابھی تک کوئی حتمی فیصلہ نہیں کیا، اور غالباً آخری لمحے تک نہیں کریں گے۔انہوں نے کہا کہ  میرے ذہن میں کچھ خیالات ہیں کہ کیا کرنا چاہیے، لیکن میں نے حتمی فیصلہ نہیں کیا۔ مجھے آخری لمحے میں فیصلہ کرنا پسند ہے، کیونکہ جنگ کے معاملے میں حالات لمحہ بہ لمحہ بدل سکتے ہیں۔ جنگ میں سب کچھ اچانک ایک انتہا سے دوسری انتہا تک جا سکتا ہے۔"امریکہ کے ممکنہ طور پر اس تنازعے میں شامل ہونے کے بارے میں یہ غیر یقینی صورتحال نہ صرف عالمی سطح پر اضطراب کا باعث بنی ہے بلکہ اندرون ملک بھی ٹرمپ کے لیے سیاسی تنازع کا سبب بن رہی ہے۔

اب تک 1320 ہلاک 

 واشنگٹن میں قائم انسانی حقوق کے گروپ "ہیومن رائٹس ایکٹوسٹ" کے مطابق، ایران میں جاری اسرائیلی فضائی حملوں کے نتیجے میں اب تک کم از کم 639 افراد ہلاک ہو چکے ہیں، جبکہ 1,320 سے زائد افراد زخمی ہوئے ہیں۔ یہ تنازع اب ساتویں روز میں داخل ہو چکا ہے۔ہیومن رائٹس ایکٹوسٹ، جو 2022 میں مہسا امینی کی ہلاکت کے بعد ایران میں ہونے والے حکومت مخالف مظاہروں کے دوران بھی ہلاکتوں کے تفصیلی اعداد و شمار فراہم کر چکا ہے، نے بتایا کہ اسرائیلی حملوں میں ہلاک ہونے والوں میں 263 عام شہری اور 154 سیکیورٹی فورسز کے اہلکار شامل ہیں۔اس گروپ کا کہنا ہے کہ اس نے ایران بھر میں اپنے مقامی ذرائع اور رپورٹس کی مدد سے ان ہلاکتوں کی تصدیق کی ہے، جن کی جانچ پڑتال ایک مخصوص نیٹ ورک کے ذریعے کی گئی۔ایران نے اب تک سرکاری طور پر ان حملوں کے نتیجے میں ہلاکتوں کے مکمل اور باقاعدہ اعداد و شمار جاری نہیں کیے۔ حکومت کی جانب سے آخری بار جو تعداد بتائی گئی تھی، اس کے مطابق اسرائیلی حملوں میں 224 افراد جاں بحق اور 1,277 زخمی ہوئے تھے۔

 اقوام متحدہ کے سیکریٹری جنرل کی فوری جنگ بندی کی اپیل

اقوام متحدہ کے سیکریٹری جنرل انتونیو گوتیریس نے ایک بیان میں کہا ہے کہ مشرق وسطیٰ میں اسرائیل اور ایران کے درمیان جاری فوجی کشیدگی پر انہیں گہری تشویش ہے۔انہوں نے کہا کہ میں ایک مرتبہ پھر فوری کشیدگی میں کمی اور جنگ بندی کے لیے اپیل کرتا ہوں۔ میں تمام فریقوں سے پرزور اپیل کرتا ہوں کہ وہ اس تنازعے کو مزید بین الاقوامی رنگ دینے سے گریز کریں۔ کسی بھی اضافی فوجی مداخلت کے نہایت سنگین نتائج برآمد ہو سکتے ہیں، جو نہ صرف براہ راست فریقین بلکہ پورے خطے اور عالمی امن و سلامتی کو متاثر کر سکتے ہیں۔اقوام متحدہ کے سربراہ نے کہا کہ ایران کے جوہری پروگرام اور خطے کی سیکیورٹی سے متعلق خدشات کو دور کرنے کا بہترین اور واحد راستہ سفارت کاری ہے۔ایران کی جانب سے سلامتی کونسل کا ایک اور ہنگامی اجلاس طلب کرنے کی درخواست

اقوام متحدہ میں ایران کے مشن نے ایک خط میں کہا ہے کہ ’’اس غیرقانونی مہم میں امریکہ کی براہ راست شمولیت کے ناقابل تردید شواہد کی وجہ سے صورتحال خطرناک حد تک بگڑ چکی ہے۔ایرانی مشن نے اس خط میں سابق صدر ڈونلڈ ٹرمپ کی جانب سے ایران کے سپریم لیڈر آیت اللہ خامنہ ای کو قتل کرنے کی ’’کھلی دھمکی‘‘ اور ملک کی جوہری تنصیبات کو نشانہ بنانے کی دھمکیوں کی شدید مذمت کی۔خط میں مزید کہا گیا: ’’یہ واضح طور پر جنگی کارروائیوں، ریاستی سطح پر جارحیت اور دہشت گردی کے اقدامات میں اعلیٰ ترین سطح پر مربوط شراکت داری کی نشاندہی کرتا ہے۔‘’یہ غیر ذمہ دارانہ اور اشتعال انگیز بیانات، خاص طور پر اقوام متحدہ کی سلامتی کونسل کے مستقل رکن ریاست کے سربراہ کی جانب سے، بین الاقوامی قانون کی سنگین اور کھلی خلاف ورزی ہیں۔‘سلامتی کونسل نے جمعہ کو ہنگامی اجلاس منعقد کیا تھا، صرف چند گھنٹے بعد جب اسرائیل نے ایران کے خلاف اپنے پہلے حملے کیے۔ اقوام متحدہ میں اسرائیل اور امریکہ کے نمائندوں نے ایرانی اہداف پر اسرائیلی فضائی حملوں کا دفاع کیا، جبکہ دیگر کونسل ارکان کی اکثریت نے کشیدگی کم کرنے کی اپیل کی۔