میلبورن: ایک نئے مطالعے میں یہ دعویٰ کیا گیا ہے کہ جب پلاسٹک یا اندر سے پلاسٹک کی تہہ والے کافی کپ گرم مشروبات کے رابطے میں آتے ہیں تو ان سے بڑی مقدار میں مائیکروپلاسٹک ذرات خارج ہو سکتے ہیں، جو براہِ راست مشروب میں شامل ہو جاتے ہیں۔

’جرنل آف ہیزرڈس میٹیریلز: پلاسٹکس‘ میں شائع اس تحقیق کے مطابق، درجۂ حرارت مائیکروپلاسٹک کے اخراج کا سب سے اہم سبب ہے اور کپ کا مواد اس میں فیصلہ کن کردار ادا کرتا ہے۔ جیسے جیسے مشروب کا درجۂ حرارت بڑھتا ہے، پلاسٹک سے باریک ذرات کے اخراج کی شرح بھی بڑھ جاتی ہے۔

مطالعے میں بتایا گیا ہے کہ آسٹریلیا میں ہر سال تقریباً 1.45 ارب سنگل یوز گرم مشروبات کے کپ استعمال کیے جاتے ہیں، جبکہ عالمی سطح پر یہ تعداد تقریباً 500 ارب سالانہ ہے، اور ممکن ہے کہ یہ اس سے بھی زیادہ ہو۔ اتنے بڑے پیمانے پر استعمال کے باعث ممکنہ صحت کے خطرات بھی وسیع ہو سکتے ہیں۔ محققین نے ابتدائی طور پر 30 سابقہ مطالعات کا تجزیہ کیا، جن میں پولی ایتھیلین اور پولی پروپائلین جیسے عام پلاسٹک کے رویے کا جائزہ لیا گیا تھا۔

اس سے معلوم ہوا کہ گرم مائع کے رابطے میں آنے پر مائیکروپلاسٹک کا اخراج چند سو ذرات سے لے کر فی لیٹر لاکھوں ذرات تک ہو سکتا ہے۔ تاہم، مشروب کو کپ میں کتنی دیر رکھا گیا، یہ اتنا اہم عنصر ثابت نہیں ہوا جتنا کہ اس کا درجۂ حرارت۔ اس کے بعد محققین نے برسبین علاقے سے 400 کافی کپ کی دو اقسام جمع کر کے ان کا تجربہ کیا۔ ان میں مکمل طور پر پلاسٹک سے بنے کپ اور اندر سے باریک پلاسٹک تہہ والے کاغذی کپ شامل تھے۔

ان کپوں کو ٹھنڈے (5 ڈگری سیلسیس) اور گرم (60 ڈگری سیلسیس) مشروبات کے ساتھ آزمایا گیا۔ نتائج کے مطابق، دونوں اقسام کے کپ مائیکروپلاسٹک ذرات خارج کرتے ہیں، تاہم مکمل پلاسٹک کے کپوں سے کاغذی کپوں کے مقابلے میں زیادہ ذرات خارج ہوتے ہیں۔ گرم مشروبات کی صورت میں مائیکروپلاسٹک کا اخراج ٹھنڈے مشروبات کے مقابلے میں تقریباً 33 فیصد زیادہ پایا گیا۔ مطالعے میں اندازہ لگایا گیا ہے کہ اگر کوئی شخص روزانہ پولی ایتھیلین کے کپ میں 300 ملی لیٹر گرم کافی پیتا ہے تو وہ ایک سال میں تقریباً 3 لاکھ 63 ہزار مائیکروپلاسٹک ذرات نگل سکتا ہے۔

محققین کے مطابق، پلاسٹک کے کپ کی اندرونی سطح کھردری ہوتی ہے، جس کی وجہ سے ذرات آسانی سے ٹوٹ کر الگ ہو جاتے ہیں۔ گرمی کے باعث پلاسٹک نرم ہو جاتا ہے اور اس کے ذرات کے پھیلنے اور سکڑنے کا عمل تیز ہو جاتا ہے، جس سے مائیکروپلاسٹک کا اخراج بڑھ جاتا ہے۔

تاہم، مطالعے میں یہ بھی کہا گیا ہے کہ صارفین کو اپنی کافی پینے کی عادت مکمل طور پر ترک کرنے کی ضرورت نہیں ہے۔ خطرات کم کرنے کے لیے اسٹین لیس اسٹیل، سیرامک یا شیشے کے دوبارہ استعمال کے قابل کپ بہتر متبادل ہیں۔ اگر ڈسپوزیبل کپ کا استعمال ناگزیر ہو تو اندر سے پلاسٹک لائننگ والے کاغذی کپ نسبتاً کم مائیکروپلاسٹک خارج کرتے ہیں۔ اس کے علاوہ، محققین نے مشورہ دیا ہے کہ بہت زیادہ گرم یا ابلتے ہوئے مشروبات کو براہِ راست پلاسٹک یا پلاسٹک لائننگ والے کپ میں ڈالنے سے گریز کیا جائے، کیونکہ درجۂ حرارت میں معمولی کمی بھی مائیکروپلاسٹک کے اخراج کو کم کر سکتی ہے۔