اسلام آباد: پاکستان نے کہا ہے کہ افغان سیکیورٹی فورسز کی جانب سے سرحدی علاقوں میں کیے گئے "بلاجواز" حملوں کے جواب میں اس نے افغانستان کی کئی سرحدی چوکیوں، تربیتی مراکز اور دہشت گردوں کے ٹھکانوں کو نشانہ بنایا اور انہیں تباہ کر دیا۔

افغان طالبان حکومت کی وزارتِ دفاع نے اتوار کی صبح ان حملوں کی تصدیق کی اور کہا کہ ان کی سیکیورٹی فورسز نے جوابی کارروائی کی ہے۔ وزارت نے کہا: اگر مخالف فریق نے افغانستان کی علاقائی خودمختاری کی دوبارہ خلاف ورزی کی تو افغان مسلح افواج اپنی سرحدوں کا دفاع کرنے کے لیے پوری طرح تیار ہیں اور بھرپور جواب دیں گی۔

رپورٹ کے مطابق افغان فورسز نے پاکستان کے صوبہ خیبر پختونخوا میں واقع انگور اڈہ، باجوڑ، کرم، دیر، چترال اور بلوچستان کے بارامچہ علاقے میں پاکستانی چوکیوں پر حملے کیے۔ پاکستان کے وزیر داخلہ محسن نقوی نے طالبان کے ان حملوں کو بلاوجہ قرار دیتے ہوئے ان پر عام شہریوں کو نشانہ بنانے کا الزام لگایا۔

انہوں نے کہا کہ افغان فورسز کی جانب سے شہری آبادی پر فائرنگ بین الاقوامی قوانین کی کھلی خلاف ورزی ہے۔ پاکستان کی سیکیورٹی فورسز نے فوری اور مؤثر جواب دیا ہے اور اب کسی بھی اشتعال انگیزی کو برداشت نہیں کیا جائے گا۔ ان کا کہنا تھا کہ پاکستانی افواج پوری طرح چوکس ہیں اور افغانستان کو "اینٹ کا جواب پتھر سے" دیا جا رہا ہے۔

پاکستان اور افغانستان کے درمیان حالیہ کشیدگی کی ایک بڑی وجہ تحریک طالبان پاکستان (ٹی ٹی پی) کی جانب سے افغانستان کی زمین استعمال کرتے ہوئے پاکستان میں مسلسل دہشت گرد حملے کرنا ہے۔ ان حملوں میں حالیہ دنوں میں خیبر پختونخوا کے ضلع اورکزئی میں ایک ایسا حملہ بھی شامل ہے جس میں ایک لیفٹیننٹ کرنل، ایک میجر سمیت 11 فوجی شہید ہوئے۔

کابل سے جمعرات کی شب دھماکوں کی آوازیں سنی گئیں جن کا الزام افغان حکام نے پاکستان پر لگایا، تاہم پاکستانی فوج کی جانب سے اس پر کوئی تبصرہ نہیں کیا گیا۔ خیال کیا جاتا ہے کہ انہی دھماکوں کے بعد افغان فورسز نے ہفتہ کی رات پاکستان پر حملے کیے۔

اس کے جواب میں پاکستان نے اتوار کی صبح جوابی کارروائی کرتے ہوئے کئی افغان سرحدی چوکیوں کو نشانہ بنایا اور انہیں نقصان پہنچایا۔ تاحال پاکستانی فوج کی جانب سے کوئی باضابطہ بیان جاری نہیں ہوا، لیکن سیکیورٹی ذرائع کے مطابق ان حملوں میں کئی افغان چوکیوں اور دہشت گردوں کے مراکز کو شدید نقصان پہنچا ہے۔ ذرائع کا کہنا ہے کہ متعدد افغان فوجی مارے گئے اور پاکستانی فورسز کی مؤثر کارروائی کے باعث دہشت گرد عناصر کو پسپا ہونا پڑا۔