نئی دہلی/ آواز دی وائس
ہندوستان نے دہشتگردی کے خلاف اپنے مقاصد پورے ہونے کے بعد اگرچہ پاکستان کے ساتھ سیزفائر پر رضامندی ظاہر کر دی ہے، لیکن ہمسایہ ملک کی رسوائی کا سلسلہ ختم ہونے کا نام نہیں لے رہا۔ اس کے اعمال ہی ایسے ہیں کہ پوری دنیا میں اس کی جگ ہنسائی ہو رہی ہے۔ اب آسٹریلیا کے میڈیا— اسکائی نیوز آسٹریلیا— نے پاکستان کا خوب مذاق اُڑایا ہے۔ اس نے یوٹیوب پر اپنی ایک ویڈیو رپورٹ میں صاف طور پر کہا کہ ہندوستان کی تینوں افواج کی پریس کانفرنس کی نقل کرتے ہوئے پاکستان نے تو پریس کانفرنس کر دی، لیکن ہندوستان کی طرح ثبوت اور بصری مواد کے ذریعے اپنے دعوے کو ثابت نہ کر سکا۔
اس ویڈیو رپورٹ میں کہا گیا ہے کہ پاکستانی فوج نے جو پریس کانفرنس کی وہ ہندوستان کی طرف سے کی گئی پریس کانفرنس کی نقل تھی، لیکن پاکستان نے اپنے دعووں کو ثابت کرنے کے لیے نہ کوئی طاقتور ویڈیو دکھائی اور نہ ہی کوئی ثبوت پیش کیا۔ پاکستانی حکام نے صرف ان مبینہ مقامات کے نام دہرائے جہاں انہوں نے مبینہ طور پر حملے کیے تھے۔
اسکائی نیوز آسٹریلیا نے پھر ان ٹویٹس کو دکھایا جن میں لوگ پاکستان کی پریس کانفرنس پر تنقید کر رہے تھے۔ ان کا کہنا تھا کہ نقل میں بھی عقل چاہیے جو پاکستان کی طرف سے نہیں دکھائی دی۔ پاکستان نے ہندوستان کی طرز پر پریس کانفرنس تو کی، لیکن ہندوستان کی طرح ثبوتوں کے ساتھ اپنے دعوے کو ثابت نہیں کر سکا۔ اس میڈیا ہاؤس نے کہا کہ پاکستان ابھی بھی اپنے دعووں کو ثابت کرنے کے لیے سوشل میڈیا سے سامنے آئے بصری مواد پر ہی انحصار کر رہا ہے۔ پاکستان کی پریس کانفرنس میں ٹھوس ثبوت کی جگہ میڈیا اور سوشل میڈیا کے کلپس دکھائے گئے۔ نیوز ہاؤس کے مطابق ایک ٹویٹر صارف نے یہ بھی لکھا کہ پاکستان آرمی کی پریس کانفرنس دیکھ کر ایسا لگا جیسے کسی کو اسکول پروجیکٹ بنانے کو دیا گیا ہو لیکن وہ صحیح سے بنا نہ پایا۔
