اسلام آباد، پاکستان: ایمنسٹی انٹرنیشنل نے پاکستان کے وزیر اعظم شہباز شریف سے انسانی حقوق کی وکلا ایمن مزاری-حاضر اور ہادی علی چٹہ کو فوری اور بلاشرط رہا کرنے کی اپیل کی ہے۔ ان دونوں کو قصوروار قرار دیے جانے اور طویل عرصے تک جیل میں رکھے جانے کے معاملے نے اختلافِ رائے کو دبانے کے لیے سائبر کرائم قوانین کے مبینہ غلط استعمال پر شدید تشویش پیدا کر دی ہے۔
وزیر اعظم شہباز شریف کو لکھے گئے خط میں ایمنسٹی نے کہا کہ دونوں وکلا کو 23 جنوری 2026 کو گرفتار کیا گیا تھا، حالانکہ انہیں دو روز قبل ہی گرفتاری سے قبل ضمانت مل چکی تھی۔ اگلے ہی روز اسلام آباد کی ضلعی و سیشن عدالت نے انہیں ’پریوینشن آف الیکٹرانک کرائمز ایکٹ‘ (PECA) کی مختلف دفعات کے تحت 10 سے 17 سال تک قید کی سزا سنائی۔
ان دفعات میں سائبر دہشت گردی، جرم کو فروغ دینے اور مبینہ طور پر غلط یا جعلی معلومات پھیلانے سے متعلق الزامات شامل تھے۔ ایمنسٹی کے مطابق یہ الزامات بنیادی طور پر ایکس (سابق ٹوئٹر) پر کی گئی پوسٹس سے متعلق تھے۔ ان پوسٹس میں مزاری-حاضر نے بلوچ اور پشتون کارکنوں سے اظہار یکجہتی کیا تھا اور پاکستان کی فوج کی پالیسیوں پر تنقید کی تھی۔ چٹہ کے خلاف بھی ان پوسٹس کو دوبارہ شیئر کرنے پر مقدمہ چلایا گیا۔
انسانی حقوق کی تنظیم نے کہا کہ مقدمے کی کارروائی ’’غیر معمولی عجلت‘‘ میں مکمل کی گئی اور وکلا کو گواہوں سے جرح کرنے اور ثبوت پیش کرنے کے مواقع بار بار نہیں دیے گئے، جس سے منصفانہ سماعت کے حوالے سے سنگین خدشات پیدا ہوتے ہیں۔ اس کے بعد سے ان کی سزا پر روک لگانے کے لیے دائر اپیلوں اور درخواستوں میں طویل تاخیر ہو رہی ہے۔
ایمنسٹی نے کہا کہ 12 مئی کو پاکستان کی سپریم کورٹ نے اسلام آباد ہائی کورٹ کو ہدایت دی تھی کہ وہ سزا پر روک لگانے کی درخواستوں پر دو ہفتوں کے اندر فیصلہ کرے۔ تاہم تنظیم کے مطابق ان کی اپیل پر اب تک کوئی ٹھوس سماعت نہیں ہوئی ہے۔ ایمنسٹی نے کہا کہ مسلسل تاخیر ان کے اپیل کے حق کی خلاف ورزی ہو سکتی ہے اور الزام عائد کیا کہ ان کی حراست کو طول دینے کے لیے عدالتی اور انتظامی رکاوٹوں کا استعمال کیا جا رہا ہے۔
ایمنسٹی نے جیل میں ایمن مزاری-حاضر کی بگڑتی ہوئی صحت پر بھی تشویش ظاہر کی۔ تنظیم کے مطابق انہیں مسوڑھوں سے زیادہ خون بہنے، دانتوں اور معدے سے متعلق مسائل اور سینے کے انفیکشن کا سامنا ہے، جبکہ انہیں مناسب طبی علاج حاصل کرنے میں بھی مشکلات پیش آ رہی ہیں۔ بتایا جاتا ہے کہ ان کے اہل خانہ نے دانتوں کے ڈاکٹر سے مشورے کے بعد ان کے لیے ادویات بھیجی تھیں، لیکن ان میں سے تمام ادویات ان تک نہیں پہنچائی گئیں۔
