اسلام آباد:پاکستان اور افغانستان کے حکام ہفتے کے روز ترکی میں سرحدی کشیدگی کم کرنے اور مسائل کو بات چیت کے ذریعے حل کرنے کے لیے مذاکرات کے دوسرے دور میں شرکت کریں گے۔ حکام نے اس بات کی تصدیق کی ہے۔ قطر کے دارالحکومت دوحہ میں 19 اکتوبر کو ہونے والے پہلے دور کے مذاکرات کے بعد، پاکستان۔افغانستان سرحد پر عارضی طور پر امن بحال ہوا تھا، جس کے بعد یہ دوسرا دور منعقد ہو رہا ہے۔

ان مذاکرات کی میزبانی قطر اور ترکی نے مشترکہ طور پر کی تھی، اور فریقین 25 اکتوبر کو استنبول میں دوبارہ ملاقات پر متفق ہوئے تھے تاکہ باہمی سلامتی سے متعلق خدشات پر بات چیت جاری رکھی جا سکے۔ پاکستان کی وزارتِ خارجہ کے ترجمان طاہر اندرابی نے جمعہ کو ایک بیان میں تصدیق کی کہ طے شدہ پروگرام کے مطابق آئندہ مذاکرات ہوں گے۔

انہوں نے کہا کہ پاکستان کو امید ہے کہ ترکی کی میزبانی میں استنبول میں ہونے والے اس اجلاس میں ایک "ٹھوس نگرانی کا طریقہ کار" (concrete monitoring mechanism) قائم کیا جائے گا۔ افغانستان میں طالبان حکومت کے ترجمان ذبیح اللہ مجاہد نے بھی استنبول مذاکرات کی تصدیق کرتے ہوئے بتایا کہ افغان وفد کی قیادت وزارتِ داخلہ کے نائب وزیر مولوی رحمت اللہ نجیب کریں گے۔

مجاہد نے سوشل میڈیا پر ایک پیغام میں کہا، “اجلاس میں (پاکستان کے ساتھ) باقی مسائل پر بھی گفتگو کی جائے گی۔” سال 2021 میں طالبان کے اقتدار میں آنے کے بعد سے پاکستان میں دہشت گرد حملوں میں اضافہ ہوا ہے۔ پاکستان بارہا افغان حکام سے یہ مطالبہ کرتا آیا ہے کہ وہ تحریکِ طالبان پاکستان (TTP) کے اُن جنگجوؤں کے خلاف کارروائی کریں جو افغان سرزمین استعمال کر کے پاکستان میں حملے کرتے ہیں، مگر اس حوالے سے اسے محدود کامیابی حاصل ہوئی ہے۔

۔ بڑھتے ہوئے عدم اعتماد کے باعث 2,611 کلومیٹر طویل سرحد، یعنی ڈورنڈ لائن پر، حالیہ مہینوں میں متعدد جھڑپیں ہو چکی ہیں۔ افغانستان نے اب تک ڈورنڈ لائن کو باضابطہ طور پر تسلیم نہیں کیا ہے۔