کراچی: پوش علاقے ڈیفنس فیز 6 کے اتحاد کمرشل میں واقع ایک فلیٹ سے اداکارہ اور ماڈل حمیرا اصغر علی کی کئی روز پرانی لاش برآمد ہوئی ہے۔ پولیس کا کہنا ہے کہ لاش اتنی خراب حالت میں ہے کہ حتمی شناخت صرف ڈی این اے ٹیسٹ کے ذریعے ہی ممکن ہو سکے گی۔

تھانہ گزری کی پولیس کے مطابق، یہ فلیٹ عمارت کی چوتھی منزل پر واقع ہے جہاں اداکارہ کرائے پر مقیم تھیں۔ ریسکیو ادارے کے اہلکاروں نے لاش کو قانونی کارروائی کے لیے اسپتال منتقل کیا۔ ان کا کہنا ہے کہ لاش کی حالت دیکھ کر اندازہ ہوتا ہے کہ موت کو کئی دن گزر چکے ہیں۔

ایس ایس پی ساؤتھ مہظور علی نے بتایا کہ فلیٹ مالک کی جانب سے اداکارہ کے خلاف کرایہ ادا نہ کرنے پر عدالت سے رجوع کیا گیا تھا۔ عدالت کے حکم پر جب بیلف اور پولیس اہلکار منگل کی شام فلیٹ میں داخل ہوئے تو وہاں ایک ناقابل شناخت لاش ملی۔

پولیس نے فلیٹ کو سیل کر کے شواہد اکٹھے کر لیے ہیں اور واقعے کی تفتیش جاری ہے۔ علاقے کے مکینوں کے مطابق، متوفیہ گزشتہ سات برس سے اس فلیٹ میں مقیم تھیں۔

پولیس کا کہنا ہے کہ اب تک اداکارہ کا کوئی قریبی عزیز سامنے نہیں آیا۔ ایس ایس پی کے مطابق، سوشل میڈیا پر موجود تصاویر دیکھ کر بھی وثوق سے نہیں کہا جا سکتا کہ یہ لاش حمیرا اصغر علی کی ہی ہے، اس لیے شناخت کے لیے ڈی این اے سیمپلز کا انتظار کیا جا رہا ہے۔

واضح رہے کہ حمیرا اصغر علی نے 2022 میں اے آر وائی ڈیجیٹل کے ریئلٹی شو ’تماشا گھر‘ میں بھی شرکت کی تھی