اسلام آباد، پاکستان اور افغان طالبان کے درمیان جمعرات کو استنبول میں امن مذاکرات دوبارہ شروع ہونے جا رہے ہیں، جن کا مقصد سرحد پار دہشت گردی کے مسئلے سے نمٹنا اور دونوں فریقوں کے درمیان مزید کشیدگی سے بچنا ہے۔

11 اکتوبر کو سرحدی فوجیوں کے درمیان جھڑپیں ہوئیں جن کے نتیجے میں دونوں جانب ہلاکتیں ہوئیں۔ پاکستان کا دعویٰ ہے کہ کم از کم 206 افغان طالبان اور تحریک طالبان پاکستان (ٹی ٹی پی) کے 110 جنگجو مارے گئے، جبکہ پاکستان کے 23 فوجی شہید ہوئے۔ دونوں ممالک کے درمیان 15 اکتوبر کو فائر بندی پر اتفاق ہوا، جسے 19 اکتوبر کو دوحہ اور 25 اکتوبر کو استنبول میں ہونے والے دو ادوار کے دوران مزید توسیع دی گئی۔

اگرچہ عارضی جنگ بندی ابھی تک برقرار ہے، لیکن دونوں فریقوں کے عہدیداروں کے بیانات اور سوشل میڈیا پر باہمی تلخی واضح طور پر نظر آتی ہے۔

استنبول مذاکرات کے ناکام ہونے کا خدشہ پیدا ہو گیا تھا، تاہم ترکی کی مداخلت سے صورتحال سنبھل گئی اور ایک اور دور پر اتفاق کیا گیا، جس کے لیے دونوں ممالک کے اعلیٰ حکام استنبول پہنچ چکے ہیں۔

تیسرے دور کے مذاکرات ترکی اور قطر کی مشترکہ میزبانی میں ہو رہے ہیں۔ پاکستان کے وفد کی قیادت انٹر سروسز انٹیلی جنس (آئی ایس آئی) کے ڈائریکٹر جنرل اور قومی سلامتی کے مشیر لیفٹیننٹ جنرل عاصم ملک کر رہے ہیں، جب کہ وفد میں فوج، انٹیلی جنس اداروں اور وزارتِ خارجہ کے سینئر حکام شامل ہیں۔

افغان طالبان کے وفد میں جنرل ڈائریکٹوریٹ آف انٹیلی جنس (جی ڈی آئی) کے سربراہ عبد الحق واسق، نائب وزیرِ داخلہ رحمت اللہ نجیب، طالبان کے ترجمان سہیل شاہین، انس حقانی، قاہر بلخی، ذاکر جلالی اور انقرہ میں افغانستان کے ناظم الامور شامل ہیں۔ مذاکرات دو روز تک جاری رہنے کی توقع ہے۔

ترک وزارتِ خارجہ نے گزشتہ دور کے بعد ایک مشترکہ بیان جاری کیا تھا، جس میں کہا گیا تھا کہ تمام فریقین نے جنگ بندی کے تسلسل اور امن کے قیام کو یقینی بنانے کے لیے ایک مانیٹرنگ اور تصدیقی نظام کے قیام پر اتفاق کیا ہے، جو خلاف ورزی کرنے والے فریق پر جرمانہ عائد کرے گا۔

بیان میں مزید کہا گیا تھا کہ دونوں فریقوں کے "سربراہان" 6 نومبر کو استنبول میں دوبارہ ملاقات کریں گے تاکہ عمل درآمد کے طریقہ کار پر تبادلہ خیال کیا جا سکے۔

پاکستان کا مؤقف بدستور یہی ہے کہ افغان سرزمین پاکستان کے خلاف دہشت گردی کے لیے استعمال نہیں ہونی چاہیے۔

اس ہفتے کے اوائل میں پاکستانی فوج کے ترجمان لیفٹیننٹ جنرل احمد شریف چوہدری نے کابل پر ٹی ٹی پی کے جنگجوؤں کو پناہ دینے کا الزام لگایا، اور کہا کہ افغان سرزمین سے حملے روکنا پاکستان کا ایسا مطالبہ ہے جس پر کوئی سمجھوتہ نہیں کیا جا سکتا۔

ان کا کہنا تھا کہ ٹی ٹی پی افغان طالبان کی ایک شاخ ہے، اور انہوں نے اس گروہ پر الزام لگایا کہ وہ اپنے جنگجوؤں کو محفوظ رکھنے کے لیے انہیں آبادی والے علاقوں میں منتقل کر رہا ہے۔

لیفٹیننٹ جنرل احمد شریف چوہدری نے خبردار کیا کہ اگر یہ مسئلہ مذاکرات کے ذریعے حل نہ ہوا تو پاکستان کارروائی کا حق محفوظ رکھتا ہے، اور کسی بھی حملے کا بھرپور جواب دیا جائے گا۔