واشنگٹن ڈی سی: بدھ کے روز عالمی خام تیل کی قیمتوں میں پانچ فیصد سے زیادہ اضافہ ریکارڈ کیا گیا۔ یہ اضافہ اس وقت سامنے آیا جب امریکہ نے آبنائے ہرمز میں تجارتی جہازوں پر تہران کے مبینہ حملوں کے جواب میں ایران پر نئے حملے کیے۔ امریکی سینٹرل کمانڈ (سینٹ کام) نے ایکس پر جاری بیان میں کہا، ’’یہ حملے آبنائے ہرمز سے گزرنے والے تین تجارتی جہازوں پر ایران کے حملوں کے جواب میں کیے گئے ہیں۔

ایران کی جارحیت بلااشتعال، خطرناک اور جنگ بندی کی کھلی خلاف ورزی تھی۔‘‘ انقرہ میں نیٹو سربراہی اجلاس کے موقع پر صحافیوں سے گفتگو کرتے ہوئے امریکی صدر ڈونالڈ ٹرمپ نے ایران کے ساتھ عبوری امن معاہدہ ختم کرنے کا اعلان کیا اور کہا کہ اب وہ ایران کے ساتھ کسی بھی قسم کا معاہدہ نہیں کرنا چاہتے۔

انہوں نے ایرانی قیادت کو ’’گھٹیا لوگ‘‘ قرار دیا۔ امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت 5.8 فیصد اضافے کے ساتھ 74.5 امریکی ڈالر فی بیرل تک پہنچ گئی، جبکہ عالمی معیار کے برینٹ کروڈ کی قیمت 5.65 فیصد بڑھ کر 78.35 امریکی ڈالر فی بیرل ہو گئی۔ جون میں مفاہمتی یادداشت (ایم او یو) پر دستخط کے بعد دونوں ممالک کے درمیان مذاکرات آگے بڑھے تھے، جس کے نتیجے میں تیل کی قیمتیں تنازع سے پہلے کی سطح پر واپس آ گئی تھیں۔

اس معاہدے کے تحت فوری طور پر دشمنی روک دی گئی تھی اور آبنائے ہرمز کو 60 دن کے لیے بغیر ٹول کے تجارتی جہازوں کے لیے کھول دیا گیا تھا۔ امریکہ نے اس پابندی میں دی گئی رعایت بھی واپس لے لی ہے جو عبوری امن معاہدے اور سوئٹزرلینڈ میں دونوں ممالک کے درمیان مذاکرات کے پہلے دور کے بعد ایران کو دی گئی تھی۔

کشیدگی میں کمی کے بعد تجارتی جہازوں کی آمد و رفت میں اضافہ ہوا تھا، لیکن دونوں ممالک کے درمیان حملوں کے نئے سلسلے سے خدشہ پیدا ہو گیا ہے کہ خام تیل کی قیمتیں دوبارہ اس سطح تک پہنچ سکتی ہیں جس سے عالمی مہنگائی میں اضافہ ہو سکتا ہے۔ عالمی منڈی میں خام تیل کی قیمتوں میں حالیہ کمی اور ٹرمپ کی جانب سے تیل کمپنیوں کو قیمتیں کم کرنے کی تنبیہ کے باوجود امریکہ میں پٹرول کی قیمتیں بدستور بلند ہیں۔

امریکہ میں بڑھتی ہوئی مہنگائی صدر ٹرمپ کے لیے ایک اہم سیاسی چیلنج بن گئی ہے، کیونکہ وہ نومبر میں ہونے والے وسط مدتی انتخابات کی تیاری کر رہے ہیں۔ امریکہ اور ایران کے درمیان بڑھتی ہوئی کشیدگی کے باعث امریکی فیڈرل ریزرو کی جانب سے شرح سود میں اضافے کے امکانات بھی بڑھ گئے ہیں، جبکہ نئے چیئرمین کیون وارش نے مہنگائی کو قابو میں لانا اپنی اولین ترجیح قرار دیا ہے۔