اسلام آباد: پاکستان نے ان خبروں کی تردید کی ہے جن میں دعویٰ کیا گیا تھا کہ نائب وزیرِ اعظم اور وزیرِ خارجہ اسحاق ڈار نے واشنگٹن میں امریکی وزیرِ خارجہ مارکو روبیو کے ساتھ حالیہ ملاقات کے دوران ایران کے جوہری پروگرام سے متعلق معلومات کا تبادلہ کیا تھا۔

جمعرات کو دفترِ خارجہ کے ترجمان طاہر اندرابی سے ان رپورٹس کے بارے میں سوال کیا گیا جن میں کہا گیا تھا کہ 29 مئی کو ہونے والی ملاقات میں اسحاق ڈار نے مارکو روبیو کو ایران کے جوہری پروگرام کے حوالے سے معلومات فراہم کی تھیں۔ اس پر ردِعمل دیتے ہوئے طاہر اندرابی نے کہا کہ پاکستان اس دعوے کو مسترد کرتا ہے کہ نائب وزیرِ اعظم نے ایران کے جوہری پروگرام سے متعلق کسی بھی قسم کی معلومات شیئر کی ہیں۔

انہوں نے واضح کیا کہ ایسی کوئی معلومات امریکی حکام کے ساتھ شیئر نہیں کی گئیں۔ یہ دعویٰ امریکی خفیہ ایجنسی سی آئی اے کے سابق تجزیہ کار لیری جانسن نے ایک نامعلوم ذریعے کے حوالے سے کیا تھا۔ ان کا کہنا تھا کہ اسحاق ڈار اور مارکو روبیو کے درمیان گفتگو میں اس بات کا ذکر ہوا کہ ایران اپنی خودمختاری برقرار رکھنے کے لیے کیا اقدامات کرنے کو تیار ہے۔

واشنگٹن کے مختصر دورے کے دوران اسحاق ڈار کی مارکو روبیو سے ملاقات نئی دہلی میں ’’کواڈ‘‘ ممالک کے وزرائے خارجہ کے اجلاس کے چند روز بعد ہوئی تھی۔ ملاقات کے بعد مارکو روبیو نے کہا تھا کہ دونوں ممالک اس بات پر متفق ہیں کہ سلامتی اور خوشحالی کے مشترکہ اہداف کے حصول کے لیے بامعنی شراکت داری کو مزید مضبوط بنانا ضروری ہے۔ پاکستانی دفترِ خارجہ کے مطابق ملاقات میں تجارت، سرمایہ کاری، سکیورٹی اور انسدادِ دہشت گردی سمیت باہمی دلچسپی کے مختلف شعبوں میں دوطرفہ تعاون کو فروغ دینے پر اتفاق کیا گیا۔