گولڈ کوسٹ (آسٹریلیا): ایران کی خواتین فٹبال ٹیم کی زیادہ تر کھلاڑی اور معاون عملے کے ارکان بدھ کے روز آسٹریلیا کی طرف سے دی گئی پناہ کی پیشکش کو مسترد کرکے اپنے وطن واپس روانہ ہو گئے۔ تاہم ٹیم کے سات ارکان نے آسٹریلیا کی پناہ کی پیشکش قبول کر لی۔ انہیں انسانی بنیادوں پر ویزا دیا گیا جس کے تحت انہیں آسٹریلیا میں مستقل طور پر رہنے کی اجازت مل گئی۔

ایرانی ٹیم کی روانگی کے خلاف سڈنی ہوائی اڈے کے باہر مظاہرے بھی ہوئے۔ ٹیم کی روانگی کا وقت قریب آنے پر انہیں ایک بار پھر پناہ لینے کی پیشکش کی گئی تھی۔ آسٹریلیا کے وزیرِ داخلہ ٹونی برک نے کہا کہ انہوں نے یہ یقینی بنانے کے لیے آخری کوششیں کیں کہ ٹیم کا ہر رکن پناہ کی پیشکش پر غور کر سکے۔

ان کے مطابق جب خواتین سکیورٹی چیک سے گزر رہی تھیں تو انہیں آسٹریلوی حکام اور مترجمین سے بات کرنے کے لیے الگ لے جایا گیا۔ برک نے کہا، “آسٹریلیا نے یہ پیشکش اس لیے کی کیونکہ ہم ان خواتین سے ذاتی طور پر بہت متاثر ہوئے ہیں۔ آسٹریلیا نے جو اختیار دیا ہے اس پر عمل کرنا آپ کا فیصلہ ہے۔ یہ ایسا اختیار ہے جس کا حق ہر فرد کو ہونا چاہیے۔

” ایرانی ٹیم کے سات ارکان کے علاوہ کسی اور نے پناہ کی پیشکش قبول نہیں کی اور باقی تمام ارکان کے ساتھ ٹیم کا طیارہ سڈنی سے روانہ ہو گیا۔ ایرانی ٹیم کے ارکان کے فیصلوں کی پیچیدہ اور غیر یقینی صورتحال بدھ کو اس وقت مزید واضح ہو گئی جب برک نے اعلان کیا کہ پناہ حاصل کرنے والے سات افراد میں سے ایک بعد میں اپنے وطن واپس جانے کا فیصلہ کر سکتا ہے۔

برک نے کہا، “آسٹریلیا میں لوگ اپنا فیصلہ تبدیل کر سکتے ہیں۔” انہوں نے بتایا کہ جن دو نئے ارکان کو پناہ دی گئی ہے ان میں ایک کھلاڑی اور ایک معاون عملے کی رکن شامل ہے۔ ان دونوں نے اپنی ٹیم کے دیگر ارکان کو ہوائی اڈے لے جانے سے پہلے ہی پناہ کی درخواست دی تھی۔ برک نے ان سات ایرانی ارکان کی تصاویر اپنے سوشل میڈیا اکاؤنٹ پر بھی شیئر کیں جن میں ان کی شناخت واضح طور پر نظر آ رہی تھی۔

یہ پورا واقعہ ایک ڈرامائی انجام تھا جو ایشیائی کپ فٹبال ٹورنامنٹ میں ایرانی ٹیم کے پہلے میچ کے بعد سے ہی آسٹریلیا میں بحث کا موضوع بنا ہوا تھا۔ ایران کی کھلاڑیوں نے اپنے پہلے میچ سے قبل قومی ترانے کے دوران خاموشی اختیار کی تھی جسے کافی شہ سرخیاں ملی تھیں۔ ایران اور اسرائیل کے درمیان جنگ شروع ہونے سے کچھ پہلے گزشتہ ماہ ایرانی ٹیم اے ایف سی ویمن ایشین کپ میں شرکت کے لیے آسٹریلیا پہنچی تھی۔

ٹیم جلد ہی ٹورنامنٹ سے باہر ہو گئی جس کے بعد اسے اپنے وطن واپس جانا تھا، جہاں جنگ کے باعث حالات خراب ہیں۔ آسٹریلیا کا دورہ کرنے والی ایرانی ٹیم میں 26 کھلاڑی اور معاون عملے کے ارکان شامل تھے۔ آسٹریلیا میں مقیم ایرانی کمیونٹی کے افراد اور امریکہ کے صدر ڈونلڈ ٹرمپ نے آسٹریلوی حکومت سے ان خواتین کی مدد کرنے کی اپیل کی تھی جو کھل کر پناہ کی درخواست نہیں کر پا رہی تھیں۔

بدھ کو آسٹریلیا میں اس وقت مزید غصہ پھیل گیا جب ایک تصویر سامنے آئی جس میں ایک خاتون کو اس کی ساتھی کھلاڑی کلائی سے پکڑ کر ہوائی اڈے جانے والی بس میں لے جا رہی تھی جبکہ ٹیم کے ایک اور رکن کا ہاتھ اس کے کندھے پر تھا۔ دوسری جانب ایران کے ایک عہدیدار نے اس دعوے کو مسترد کر دیا کہ خواتین کے لیے وطن واپس جانا غیر محفوظ ہے۔

ایران کے نائب صدر محمد رضا عارف نے کہا، “ایران اپنے بچوں کا کھلے دل سے استقبال کرتا ہے اور حکومت ان کی سلامتی کی ضمانت دیتی ہے۔ کسی کو بھی ایران کے خاندانی معاملات میں مداخلت کرنے یا ماں سے زیادہ مہربان دائی بننے کا حق نہیں ہے۔” ایران کے سرکاری ٹی وی کے مطابق ملک کی فٹبال فیڈریشن نے اس معاملے کو ٹرمپ کی جانب سے “فٹبال میں براہِ راست سیاسی مداخلت” قرار دیتے ہوئے بین الاقوامی فٹبال اداروں سے اس کا جائزہ لینے کی درخواست کی ہے۔ اس نے خبردار کیا ہے کہ اس طرح کے اقدامات سے امریکہ، کینیڈا اور میکسیکو میں 11 جون سے شروع ہونے والے ورلڈ کپ پر بھی اثر پڑ سکتا ہے۔