واشنگٹن،: امریکہ میں مقیم ہندو-امریکی برادری کی ایک تنظیم نے نیویارک میں راشٹریہ سویم سیوک سنگھ (آر ایس ایس) کے سربراہ موہن بھاگوت کے پروگرام میں شرکت کرنے والے لوگوں سے اپیل کی ہے کہ وہ ہفتہ کو ہونے والے پروگرام کی مخالفت کرنے والے کارکنوں کے ساتھ کسی بھی طرح کے ٹکراؤ سے گریز کریں۔ امریکہ میں قائم غیر منافع بخش تنظیم ’ہندو امریکن فاؤنڈیشن‘ (ایچ اے ایف) نے خبردار کیا ہے کہ میڈیسن اسکوائر گارڈن کے انفوسس تھیٹر میں ہفتہ کو ہونے والے ’یونیورسل اونیس سیلیبریشنز‘ پروگرام میں خلل ڈالنے اور اسے منسوخ کرانے کی کوششیں کی جا سکتی ہیں۔

اس پروگرام میں آر ایس ایس سربراہ موہن بھاگوت شرکت کریں گے۔ ’ہندوز فار ہیومن رائٹس‘ اور اسی نظریے کی حامل دیگر تنظیموں نے ہفتہ کو میڈیسن اسکوائر گارڈن کے باہر احتجاج کرنے کا منصوبہ بنایا ہے۔ یہ مظاہرہ آر ایس ایس سربراہ کے پروگرام کے دوران ہی ہوگا۔ ’ہندوز فار ہیومن رائٹس‘ کی نائب ایگزیکٹو ڈائریکٹر شرویا تاڈیپلی نے کہا، ’’موہن بھاگوت ہندوؤں کی نمائندگی نہیں کرتے۔ وہ ایک سخت گیر ہندو قوم پرست تحریک کی قیادت کرتے ہیں، جس نے اقلیتی برادریوں کے خلاف تشدد، بائیکاٹ اور خوف کو فروغ دیا ہے۔‘‘

ایچ اے ایف نے نیویارک کے میئر زہران ممدانی سے بھی اپیل کی ہے کہ وہ نیویارک کے تمام شہریوں کی سلامتی یقینی بنانے کی اپنی حلف برداری کی ذمہ داری پوری کریں، جس میں میڈیسن اسکوائر گارڈن کے پروگرام میں شرکت کرنے والے لوگ بھی شامل ہیں۔ تنظیم نے سب کی حفاظت اور شہری حقوق کی ضمانت دینے کا مطالبہ کیا ہے۔ ایچ اے ایف نے کہا، ’’اگر آپ پروگرام میں شرکت کر رہے ہیں تو مہذب رویہ اختیار کریں اور تمام لوگوں کے پرامن طور پر جمع ہونے، احتجاج کرنے اور اپنے خیالات کا اظہار کرنے کے حق کا احترام کریں۔‘‘

تنظیم نے پروگرام میں شرکت کرنے والے لوگوں سے اپنے آس پاس کے ماحول کے بارے میں چوکس رہنے اور کسی بھی مشتبہ سرگرمی کی اطلاع قانون نافذ کرنے والے اہلکاروں کو دینے کو کہا ہے۔ اس نے کہا، ’’اگر آپ کو خطرہ محسوس ہو تو اس علاقے سے نکل جائیں اور پروگرام کی سکیورٹی ٹیم یا قانون نافذ کرنے والے اہلکاروں سے رابطہ کریں۔ ہنگامی صورت حال میں 911 پر فون کریں۔ اشتعال انگیز یا دھمکی آمیز بیانات دینے والے کسی بھی شخص کے ساتھ ٹکراؤ یا جھگڑے سے گریز کریں۔‘‘ تنظیم نے لوگوں سے نفرت پر مبنی واقعات، دھمکیوں، توڑ پھوڑ، مشتبہ سرگرمیوں یا کسی بھی دوسرے جرم کی اطلاع سکیورٹی اہلکاروں یا قانون نافذ کرنے والے اداروں کو دینے کی بھی اپیل کی ہے۔