لندن: لندن فلم فیسٹیول میں بالی وڈ کی عظیم ترین فلم "شعلے" کے 50 سال مکمل ہونے کے موقع پر اس کا خصوصی مظاہرہ (اسکریننگ) کیا جائے گا۔ اس موقع پر فلم کے وہ مناظر بھی شامل کیے جائیں گے جو ہدایت کار نے ابتدا میں حذف کر دیے تھے، نیز فلم کا اصل اختتامی منظر (اورجینل اینڈ) بھی دکھایا جائے گا۔ برٹش فلم انسٹیٹیوٹ (BFI) کے زیر اہتمام ہونے والا یہ سالانہ فلمی میلہ اگلے ہفتے سے شروع ہو رہا ہے۔

فیسٹیول کی فرسٹ فیچر مقابلہ زمرہ میں لکھنؤ میں پیدا ہونے والے احمد علاؤ الدین جمال کی فلم "ہوٹل لندن" اور انُپرنا رائے کی پہلی فلم "سانگز آف فارگَٹن ٹریز" بھی شامل ہیں۔ رمیس سپی کی ہدایت کاری میں بننے والی فلم "شعلے" 15 اگست 1975 کو ریلیز ہوئی تھی۔ اس فلم نے ناظرین کو جے-ویرو (امیتابھ بچن اور دھرمیندر)، ٹھاکر (سنجیو کمار)، گبر سنگھ (امجد خان)، بسنتی (ہیما مالنی) اور رادھا (جیا بچن) جیسے ناقابلِ فراموش کردار دیے۔

امیتابھ بچن نے کہا: "فلم ہیریٹیج فاؤنڈیشن نے اس میں کہانی کے اصل اختتام اور کچھ حذف شدہ مناظر کو دوبارہ شامل کیا ہے۔ جے کا کردار ہمیشہ میرے دل میں زندہ رہے گا۔" انہوں نے مزید کہا: "اس فلم کی شوٹنگ ایک ناقابلِ فراموش تجربہ تھا، لیکن اس وقت میں نے کبھی سوچا بھی نہیں تھا کہ یہ بھارتی سنیما کی تاریخ بن جائے گی۔ ابتدا میں اسے ناکام قرار دیا گیا، مگر بعد میں اس نے باکس آفس پر ریکارڈ توڑ کامیابی حاصل کی۔

یہ سفر ہمارے لیے جذباتی اتار چڑھاؤ سے بھرا ہوا تھا۔ مجھے امید ہے کہ یہ فلم 50 سال بعد بھی دنیا بھر کی نئی نسلوں کو اپنی طرف کھینچے گی۔" فلم کے اصل انجام میں ٹھاکر کو گبر سنگھ کو ہلاک کرتے ہوئے دکھایا گیا تھا، لیکن سینما میں پیش کیے گئے ورژن میں ٹھاکر گبر کو پولیس کے حوالے کر دیتا ہے۔

دھرمیندر، جنہوں نے فلم میں امیتابھ کے قریبی دوست ویرو کا کردار نبھایا، نے کہا: "سلیم-جاوید کے مکالمے اور رمیس سپی کی ہدایت کاری کون بھول سکتا ہے؟ اس کے بے شمار مناظر بھارتی سینما کی تاریخ بن گئے ہیں اور ہر کردار ایک ستارہ بن گیا ہے۔"

انہوں نے مزید بتایا: "کم لوگوں کو معلوم ہے کہ مجھے ابتدا میں گبر اور ٹھاکر دونوں کرداروں کی پیشکش ہوئی تھی، مگر میں نے واضح کر دیا کہ مجھے ویرو کا کردار ہی کرنا ہے، کیونکہ وہ میرے مزاج کے قریب تھا۔ میں نے شوٹنگ کے دوران بے پناہ لطف اٹھایا۔ میرے پسندیدہ مناظر میں ٹینکی والا سین، مندر والا سین اور سب سے زیادہ اثر انگیز منظر جے کی موت کا ہے، جو آج تک میرے دل پر نقش ہے۔"

سپی فلمز کے پروڈیوسر شہزاد سپی نے کہا: "ہمیں تین سال لگ گئے، مگر ہم فلم کے حقیقی اختتام اور حذف شدہ مناظر حاصل کرنے میں کامیاب ہوئے۔ اس شاہکار کو از سرِ نو جوڑنا ایک محنت طلب مگر خوشگوار کام تھا۔ یہ میرے دادا جی۔ پی۔ سپی کے وژن اور ان کی وراثت کے لیے ایک خراجِ عقیدت ہے۔" فلم "شعلے" کی یہ تاریخی خصوصی نمائش 19 اکتوبر کو بی ایف آئی آئی میکس (BFI IMAX) میں ہوگی جو برطانیہ کی سب سے بڑی اسکرین ہے۔