برلن: جرمنی کی ایک عدالت نے منگل کو اہم فیصلہ سناتے ہوئے حکم دیا ہے کہ حکومت ایک افغان خاندان کو ویزا جاری کرے جسے 2021 میں طالبان کے اقتدار سنبھالنے کے بعد خطرے کی بنیاد پر جرمنی کے خصوصی تحفظاتی پروگرام میں شامل کیا گیا تھا۔

یہ فیصلہ اس وقت آیا ہے جب جرمنی کی نئی قدامت پسند حکومت، جس کی قیادت چانسلر فریڈرک مرز کر رہے ہیں، نے اس خصوصی افغان ری سیٹلمنٹ پروگرام کو معطل کر دیا ہے۔ تاہم، برلن کی انتظامی عدالت نے قرار دیا ہے کہ متعلقہ خاندان کو پہلے ہی ایک "قانونی طور پر پابند وعدہ" دیا جا چکا ہے، لہٰذا انہیں جرمنی جانے کی اجازت دی جانی چاہیے۔

ذرائع کے مطابق، ایسے تقریباً 2,500 افغان شہری، جو اس پروگرام میں شامل ہیں، اس وقت پاکستان میں مقیم ہیں اور جرمنی منتقلی کے منتظر ہیں۔

یہ پروگرام ان افغان شہریوں کے لیے شروع کیا گیا تھا جنہوں نے افغانستان میں جرمن افواج یا دیگر اداروں کے ساتھ کام کیا تھا، یا وہ صحافی اور کارکنان تھے جنہیں طالبان کی جانب سے سنگین خطرات لاحق تھے۔

تاہم، چانسلر مرز کی حکومت نے، جو کہ امیگریشن کے خلاف سخت پالیسی کے ساتھ اقتدار میں آئی ہے، اپنے اتحادی معاہدے میں اعلان کیا تھا کہ وہ اس پروگرام کو "جہاں تک ممکن ہو" ختم کرنا چاہتی ہے۔منگل کے عدالتی فیصلے میں شامل افغان خاندان، جو اس وقت پاکستان میں مقیم ہے، نے عدالت سے اپیل کی تھی کہ انہیں افغانستان واپس بھیجنے کا خطرہ لاحق ہے، جہاں ان کی جان کو شدید خطرات ہو سکتے ہیں۔

یہ خاندان 2023 میں سرکاری منظوری کے تحت جرمنی منتقل ہونے کا اہل قرار دیا گیا تھا، اور بعد ازاں انہوں نے اسلام آباد میں جرمن سفارت خانے میں ویزا کے لیے درخواست دی، جو تاحال جاری نہیں کیا گیا۔

عدالت نے اپنے فیصلے میں کہا:"حکومت کو یہ اختیار حاصل ہے کہ وہ افغان شہریوں کے داخلے کے اس پروگرام کو کس حد تک جاری رکھتی ہے اور کن شرائط کے ساتھ۔ وہ نئی منظوریوں کو روک سکتی ہے، لیکن وہ ان منظوریوں سے دستبردار نہیں ہو سکتی جو پہلے ہی جاری کی جا چکی ہوں۔

عدالتی فیصلے کے تناظر میں حکومت پر دباؤ بڑھنے کا امکان ہے کہ وہ پہلے سے منظور شدہ کیسز پر عمل درآمد کو یقینی بنائے۔واضح رہے کہ اپریل 2024 تک کے تازہ اعداد و شمار کے مطابق، اس پروگرام کے تحت اب تک 33,000 سے زائد افغان شہری جرمنی پہنچ چکے ہیں۔