نئی دہلی: امریکی صدر ڈونلڈ ٹرمپ چین کے دورے سے واپس آ گئے ہیں اور انہوں نے صدر شی جن پنگ کے ساتھ ہونے والی بات چیت کو ’’دو عظیم ممالک کے رہنماؤں کی ملاقات‘‘ قرار دیا۔ ٹرمپ جمعہ کی شام میری لینڈ کے جوائنٹ بیس اینڈریوز پہنچے۔

انہوں نے دعویٰ کیا کہ اس دورے کے دوران کئی اہم تجارتی معاہدے طے پائے، جن میں بوئنگ کے 200 طیاروں کی چین کو فروخت اور مستقبل میں مزید 750 طیارے خریدنے کا وعدہ شامل ہے۔ انہوں نے یہ بھی کہا کہ چین نے امریکی زرعی شعبے کی حمایت کا عزم ظاہر کیا ہے۔

جمعرات کو شی جن پنگ کے ساتھ ملاقات کے بعد فاکس نیوز کو دیے گئے انٹرویو میں ٹرمپ نے کہا، ’’یہ دو عظیم ممالک ہیں۔ میں اسے ‘جی-2’ کہتا ہوں۔ میرا خیال ہے تاریخ میں اسے ایک انتہائی اہم لمحے کے طور پر یاد رکھا جائے گا۔‘‘ واشنگٹن پوسٹ کی رپورٹ کے مطابق ٹرمپ کے اس بیان سے چین کو وہ مقام ملا ہے جس کی صدر شی طویل عرصے سے خواہش رکھتے تھے، یعنی امریکہ کے ہم پلہ ایک بڑی طاقت کے طور پر شناخت۔

رپورٹ میں کہا گیا کہ دو دنوں تک جاری رہنے والی ملاقاتوں کے دوران منعقدہ تقریبات، شاندار استقبال، اور دنیا کے دو طاقتور ترین رہنماؤں کے درمیان دوستی اور باہمی احترام کا اظہار اس جغرافیائی سیاسی توازن کو واضح کرتا ہے جس کی چین طویل عرصے سے خواہش کرتا رہا ہے اور جس کی امریکہ اب تک مزاحمت کرتا آیا ہے۔ ٹرمپ نے فاکس نیوز کو یہ بھی بتایا کہ شی جن پنگ کے ساتھ اچھے تعلقات بہت اہم ہیں۔

انہوں نے اشارہ دیا کہ جب تک وہ اقتدار میں ہیں، چین غالباً تائیوان کے خلاف کوئی جارحانہ قدم نہیں اٹھائے گا۔ ٹرمپ نے کہا، ’’یہ تائیوان پر قبضے کا معاملہ نہیں ہے۔ وہ (چین) صرف یہ نہیں چاہتا کہ تائیوان خود کو ایک آزاد ملک قرار دے۔‘‘ انہوں نے مزید کہا، ’’جب تک میں اقتدار میں ہوں، مجھے نہیں لگتا کہ وہ کچھ کریں گے، لیکن میرے بعد وہ ایسا کر سکتے ہیں۔‘‘ ٹرمپ نے کہا، ’’میں چاہتا ہوں کہ چین پرامن رہے۔ ہم جنگ نہیں چاہتے۔ اگر موجودہ صورتحال برقرار رہتی ہے تو میرا خیال ہے چین بھی اس سے مطمئن رہے گا۔‘‘