اسلام آباد
مکمل ایک دہائی تک دہشت گردی کی مار جھیل کر اس پر قابو پانے کے بعد پاکستان میں دوبارہ سے اس لعنت نے سر اٹھانا شروع کر دیا ہے۔ مقامی میڈیا کے مطابق ملک کے جنوب مغربی صوبہ بلوچستان کے ضلع سبی میں بارودی سرنگ کے دھماکے میں پانچ افراد ہلاک اور پانچ زخمی ہوگئے۔
ضلع سبی کے ڈپٹی کمشنر یاسر خان بجائی نے مقامی میڈیا کو بتایا کہ بابر کچ کے علاقے سے مزدوروں سے بھری گاڑی واپس آرہی تھی کہ اچانک بارودی سرنگ میں دھماکہ ہو گیا ۔ اس کے نتیجے میں کئی لوگوں نے موقع پر ہی دم توڑ دیا ۔ امدادی ٹیموں نے فوری طور پر موقع پر پہنچ کر زخمیوں کو اسپتال پہنچایا۔
سیکورٹی اہلکاروں نے علاقہ کا محاصرہ کرکے تفتیش شروع کردی ہے۔ ابھی تک کسی تنظیم نے دھماکے کی ذمہ داری قبول نہیں کی ہے۔