بغداد: عراق اور شام کے درمیان ایک اہم سرحدی گزرگاہ ایک دہائی سے زیادہ عرصے تک بند رہنے کے بعد پیر کے روز دوبارہ کھول دی گئی، جس سے حکام کو امید ہے کہ علاقائی تجارت اور تیل کی برآمدات کو نئی رفتار ملے گی۔ شام نے اس راستے کو تیل کی برآمد کے لیے ایک محفوظ زمینی متبادل کے طور پر پیش کیا ہے، خاص طور پر ایسے وقت میں جب ایران سے متعلق کشیدگی کے باعث آبنائے ہرمز پر غیر یقینی صورتحال برقرار ہے۔

عراق میں ‘رابعیہ’ اور شام میں ‘یاروبیہ’ کے نام سے معروف یہ سرحدی راستہ 2011 میں شامی خانہ جنگی شروع ہونے کے بعد بند کر دیا گیا تھا۔ بعد ازاں 2014 میں اس علاقے پر داعش کے جنگجوؤں نے قبضہ کر لیا تھا، جسے بعد میں عراقی کرد فورسز نے دوبارہ اپنے کنٹرول میں لے لیا۔

شام کی سرکاری خبر رساں ایجنسی ‘سانا’ کے مطابق، دونوں ممالک کے حکام نے اس سرحدی راستے کے حوالے سے باہمی ہم آہنگی بڑھانے اور مشترکہ مفادات کے مطابق آمد و رفت اور تجارت کو آسان بنانے کے اقدامات پر تبادلہ خیال کیا۔ عراق کے صوبہ نینویٰ کی کونسل کی رکن نادیہ الجبوری نے افتتاحی تقریب میں کہا کہ اس راستے کے دوبارہ کھلنے سے "تجارتی سرگرمیوں کو فروغ ملے گا اور اسی راستے سے تیل کی ترسیل کو بھی نئی رفتار ملے گی۔" عراق کی معیشت بڑی حد تک تیل پر منحصر ہے، جہاں اس کی تقریباً 90 فیصد بجٹ آمدنی اسی ذریعے سے حاصل ہوتی ہے۔ اس کا زیادہ تر تیل آبنائے ہرمز کے راستے برآمد کیا جاتا ہے۔