نئی دہلی: ہندوستان کے عظیم کرکٹر کپل دیو نے پیر کو پاکستان کی جیل میں قید سابق وزیر اعظم اور ورلڈ کپ فاتح کپتان عمران خان کے ساتھ انسانی سلوک کیے جانے کی اپیل کی۔ اس سے ایک روز قبل اتوار کو کپل سمیت 22 سابق بین الاقوامی کپتانوں نے پاکستان کے وزیر اعظم شہباز شریف کو گزشتہ چھ ماہ میں دوسری مرتبہ خط لکھ کر عمران خان کے مناسب علاج اور صحت کی سہولیات کا خیال رکھنے کی اپیل کی تھی۔ اس سال فروری میں سنیل گواسکر سمیت 14 سابق کپتانوں نے اڈیالہ جیل میں عمران خان کی صحت پر گہری تشویش ظاہر کی تھی۔ عمران خان کو جیل میں مناسب طبی سہولت نہ ملنے اور طبی غفلت کے الزامات بھی سامنے آئے ہیں۔
کپل دیو نے کہا کہ انہیں پاکستان کے قوانین کی معلومات نہیں ہیں، لیکن وہ حکام سے اپیل کرتے ہیں کہ عمران خان کو قیدی کی حیثیت سے بھی بنیادی سہولیات اور انسانی سلوک فراہم کیا جائے۔ پی جی ٹی آئی کے صدر کپل دیو نے ’ڈی پی ورلڈ انڈیا چیمپئن شپ‘ کے لانچ کے موقع پر کہا، "ہم اس ملک کے قوانین سے واقف نہیں ہیں، یہ اپنی جگہ ہے۔ لیکن ہر قیدی کے ساتھ شائستگی اور انسانی سلوک ہونا چاہیے اور اسے بنیادی سہولیات ملنی چاہئیں، چاہے وہ کوئی بھی ہو۔
عمران اسی ملک کے سابق وزیر اعظم اور دنیا کے بہترین کرکٹرز میں سے ایک رہے ہیں۔" انہوں نے کہا، "ہم چاہتے ہیں کہ انہیں بہترین علاج ملے۔ ہم کسی اور چیز کا مطالبہ نہیں کر رہے اور نہ ہی کسی جواب کی توقع ہے۔ ہم صرف درخواست کر رہے ہیں۔" پاکستان کے سابق فاسٹ باؤلرز وسیم اکرم اور وقار یونس کو چھوڑ کر کسی دوسرے بڑے پاکستانی کرکٹر نے عوامی طور پر عمران خان کی حمایت میں سامنے آکر ان کے لیے بہتر طبی سہولت کا مطالبہ نہیں کیا ہے۔ اس بارے میں پوچھے جانے پر کپل دیو نے کہا کہ وہ پاکستان کے کرکٹرز کو قصوروار نہیں ٹھہرانا چاہیں گے، کیونکہ وہ اپنے ملک میں رہتے ہیں۔
انہوں نے کہا، "ہم باہر سے حالات کو دیکھ رہے ہیں۔ میں اپنے اس دوست کی حمایت کرنا چاہتا ہوں، جس کے ساتھ ہم نے کرکٹ کھیلی اور جس کی کرکٹ کی صلاحیت کی ہمیشہ تعریف کی۔" عمران خان کی حمایت میں لکھے گئے خط پر دستخط کرنے والوں میں گریگ چیپل، ایان چیپل، ایلن بارڈر، سنیل گواسکر، ڈیوڈ گاور، کلائیو لائیڈ، ارجنا رانا تنگا، اسٹیو وا اور جان رائٹ سمیت کئی عظیم سابق کرکٹرز شامل ہیں۔ عمران خان 2018 سے 2022 تک پاکستان کے وزیر اعظم رہے۔
عہدے سے ہٹائے جانے کے بعد بدعنوانی اور دیگر معاملات میں سزا سنائے جانے کے بعد سے وہ جیل میں ہیں۔ کپل دیو نے ہندوستانی اوپنر یشسوی جیسوال اور سری لنکا کے فاسٹ باؤلر اسیتھا فرنینڈو کے درمیان ہونے والی تلخ نوک جھونک پر بھی ردعمل ظاہر کیا۔ انہوں نے کہا، "کھیل میں ایسے واقعات ہوتے رہتے ہیں۔ یہ جیسوال کے کھیلنے کا انداز ہے۔ ہر کھلاڑی کی اپنی شخصیت ہوتی ہے۔ اگر وہ اسی طرح کھیلنا چاہتا ہے تو اسے میری نیک خواہشات۔ لیکن کرکٹ بورڈ کو یہ طے کرنا ہوگا کہ حد کہاں مقرر کرنی ہے اور کھلاڑی کو اس حد کو پار نہیں کرنا چاہیے۔"
