ٹوکیو، : وزیر اعظم نریندر مودی نے جمعہ کو جاپان کو ہندوستان کی ترقی کے سفر میں ایک اہم شراکت دار قرار دیتے ہوئے جاپانی صنعت کو مینوفیکچرنگ، ٹیکنالوجی، نئی نسل کے بنیادی ڈھانچے، صاف توانائی اور ہنرمندی کی ترقی جیسے شعبوں میں مل کر آگے بڑھنے کی اپیل کی۔ انہوں نے کہا کہ جاپان کی ٹیکنالوجی اور ہندوستان کا ہنر مل کر اس صدی کے تکنیکی انقلاب کی قیادت کر سکتے ہیں۔وزیراعظم مودی نے زور دیا کہ دونوں ممالک مل کر نہ صرف ایشیا میں استحکام، ترقی اور خوشحالی کو نئی جہت دیں گے بلکہ گلوبل ساؤتھ، بالخصوص افریقہ کی ترقی میں بھی اہم کردار ادا کر سکتے ہیں۔

دو روزہ جاپان کے دورے پر ٹوکیو پہنچنے کے بعد مودی نے اپنے جاپانی ہم منصب کے ساتھ انڈیا-جاپان اکنامک فورم سے خطاب کیا۔ انہوں نے کہا کہ جاپان ہمیشہ ہندوستان کی ترقی کا اہم شراکت دار رہا ہے، خاص طور پر آٹو اور مینوفیکچرنگ شعبے میں۔

انہوں نے کہا:"میں آپ سب سے گزارش کرتا ہوں، آئیے 'میک ان انڈیا، میک فار دی ورلڈ'۔ ہندوستان نے اے آئی، سیمی کنڈکٹرز، کوانٹم کمپیوٹنگ، بایوٹیک اور خلا جیسے شعبوں میں جرات مندانہ اقدامات کیے ہیں۔ جاپان کی ٹیکنالوجی اور ہندوستان کی ذہانت مل کر اس صدی کے تکنیکی انقلاب کی قیادت کر سکتی ہے۔"وزیراعظم نے ممبئی-احمدآباد ہائی اسپیڈ ریل پروجیکٹ کا ذکر کرتے ہوئے کہا کہ دونوں ممالک کا سفر یہیں ختم نہیں ہوتا۔ انہوں نے کہا کہ میٹروز سے لے کر اسٹارٹ اپس، اور سیمی کنڈکٹرز سے لے کر جوہری توانائی تک، دونوں ممالک کی شراکت داری باہمی اعتماد کی علامت بن چکی ہے۔

سوزوکی اور ڈائکن جیسی کمپنیوں کی کامیابیوں کا ذکر کرتے ہوئے مودی نے کہا کہ ہندوستان اور جاپان اس کامیابی کو بیٹریوں، روبوٹکس، جہاز سازی، اور دیگر شعبوں میں آگے بڑھا سکتے ہیں۔انہوں نے کہا کہ ہندوستان میں کی گئی اصلاحات کے باعث سرمایہ کاری نہ صرف بڑھتی ہے بلکہ کئی گنا بڑھتی ہے۔ "آج ہندوستان سیاسی اور اقتصادی استحکام، پالیسی میں شفافیت اور مضبوط صلاحیت کے ساتھ دنیا کی تیزی سے ترقی کرنے والی بڑی معیشت ہے اور جلد ہی دنیا کی تیسری سب سے بڑی معیشت بننے والا ہے۔"اپنی بات ختم کرتے ہوئے مودی نے کہا کہ:"ہندوستان جاپانی کاروبار کے لیے عالمی جنوب کا اسپرنگ بورڈ ہے۔ ہم مل کر ایشیائی صدی کو استحکام، ترقی اور خوشحالی کی شکل دیں گے۔"