میونخ:وزیر خارجہ ایس جے شنکر اور ان کی کینیڈین ہم منصب انیتا آنند نے اگلے ماہ وزیر اعظم مارک کارنی کے ممکنہ دورۂ بھارت سے قبل میونخ سیکیورٹی کانفرنس کے موقع پر دوطرفہ "تعاون کو مزید مضبوط بنانے" اور "شراکت داری کے مواقع" پر تبادلہ خیال کیا۔

گلوبل افیئرز کینیڈا (جی اے سی) کی جانب سے اتوار کو جاری بیان میں کہا گیا ہے کہ ستمبر 2025 کے بعد سے وزراء کے درمیان یہ پانچویں ملاقات ہے، جو کینیڈا-بھارت تعلقات میں بڑھتی ہوئی رفتار کی عکاسی کرتی ہے۔ جے شنکر نے ہفتہ کو ہونے والی ملاقات کے بعد سوشل میڈیا پر پوسٹ کیا، "کینیڈا کی وزیر خارجہ انیتا آنند سے ملاقات اور گفتگو بہت اچھی رہی۔ بھارت-کینیڈا تعلقات مسلسل پیش رفت کر رہے ہیں۔

دونوں وزراء نے توانائی، ٹیکنالوجی اور تجارت سمیت متعدد شعبوں میں تعاون کو مزید گہرا کرنے پر گفتگو کی۔ آنند نے سوشل میڈیا پر ایک پوسٹ میں کہا، "کینیڈا-بھارت تعلقات اور ہمارے مشترکہ مفادات کو آگے بڑھانے کے آئندہ اقدامات پر بات کرنے کے لیے اپنے بھارتی ہم منصب ڈاکٹر ایس جے شنکر سے مل کر خوشی ہوئی۔ 

آنند نے کینیڈا کے لیے ایک شراکت دار کے طور پر بھارت کی اہمیت کو اجاگر کیا، جبکہ دونوں وزراء نے دونوں ممالک کے کاروباری اداروں، صنعتوں اور کارکنوں کے لیے تکنیکی فوائد اور اہم شراکت داری کے مواقع پر تبادلہ خیال کیا۔ انہوں نے کہا، "کینیڈا تعمیری تعاون کے لیے پُرعزم ہے، اور میں بھارت میں اپنی کوششوں کو جاری رکھنے کے لیے پُرامید ہوں۔ 

وزراء نے اکتوبر 2025 میں اعلان کردہ کینیڈا-بھارت تعلقات کی مشترکہ فریم ورک پر ہونے والی ٹھوس پیش رفت پر بھی زور دیا۔ یاد رہے کہ 2023 میں اُس وقت کے وزیر اعظم جسٹن ٹروڈو کی جانب سے خالصتانی علیحدگی پسند ہردیپ سنگھ نِجّر کے قتل میں ممکنہ بھارتی مداخلت کے الزام کے بعد بھارت-کینیڈا تعلقات میں کشیدگی پیدا ہو گئی تھی۔ بھارت نے ٹروڈو کے ان الزامات کو "بے بنیاد" قرار دیتے ہوئے مسترد کر دیا تھا۔