غزہ سٹی: اسرائیلی فوج نے جمعہ کو غزہ کے سب سے بڑے شہر غزہ سٹی کو "خطرناک جنگی علاقہ" قرار دیتے ہوئے کہا ہے کہ شہر میں انسانی امداد پہنچانے کے لیے دی گئی دوپہر تک کی مہلت بھی ختم کر دی گئی ہے۔ یہ وہی شہر ہے جہاں پچھلے مہینے اسرائیل نے صبح 10 بجے سے رات 8 بجے تک کھانے پینے کی اشیا اور امدادی سامان پہنچانے کے لیے جنگ روکنے کا اعلان کیا تھا۔

غزہ سٹی، دیر البلح اور مواسی میں اس دوران ’’اسٹریٹجک وقفہ‘‘ نافذ رہا، جہاں لاکھوں بے گھر افراد نے پناہ لے رکھی ہے۔ یہ فیصلہ ایسے وقت آیا ہے جب اسرائیل اپنی کارروائی کو وسعت دینے کی تیاری کر رہا ہے اور غزہ سٹی پر قبضے کے لیے ہزاروں فوجی تعینات کر رہا ہے۔

تاہم، اسرائیلی فوج نے یہ وضاحت نہیں کی کہ آیا اس نے شہریوں یا امدادی تنظیموں کو دن میں جنگ دوبارہ شروع کرنے کے منصوبے سے آگاہ کیا ہے یا نہیں۔ اسرائیل کا دعویٰ ہے کہ غزہ سٹی حماس کا گڑھ ہے جہاں بارودی سرنگوں کا جال بچھا ہوا ہے۔ یہ شہر اس خطے کے اہم بنیادی ڈھانچے اور صحت کی سہولیات کا بھی مرکز ہے۔ اقوامِ متحدہ نے جمعرات کو خبردار کیا کہ اگر اسرائیل اپنے منصوبے کے مطابق حملہ کرتا ہے تو اس علاقے کے اسپتالوں کی نصف بستر گنجائش ختم ہو سکتی ہے۔