تہران :ایرانی میزائلوں نے اسرائیل بھر میں مختلف مقامات کو نشانہ بنای، جس کے نتیجے میں کم از کم چار افراد ہلاک اور درجنوں زخمی ہو گئے۔ یہ حملے اسرائیل کی جانب سے ایران پر جاری حملوں کے جواب میں کیے گئے۔ ایران کا کہنا ہے کہ اسرائیل کے حملوں میں اب تک کم از کم 78 افراد ہلاک ہو چکے ہیں جن میں خواتین اور بچے بھی شامل ہیں، جبکہ 320 سے زائد افراد زخمی ہوئے ہیں۔ اسرائیلی فوج ایران کے شہروں، فوجی مقامات اور جوہری تنصیبات پر حملے جاری رکھے ہوئے ہے۔

 اسرائیلی فوج کو توقع ہے کہ ایران آج رات بھی میزائل حملے کرے گا: رپورٹ

اسرائیلی آرمی ریڈیو کی رپورٹ کے مطابق اسرائیلی فوج نے خبردار کیا ہے کہ ایران کی مسلح افواج آج رات اسرائیل پر میزائلوں کی بارش کریں گی۔رپورٹ میں کہا گیا ہے کہ یہ حملے جمعے کی رات کیے گئے جوابی حملوں کی طرز پر ہوں گے۔

کوئی بیچ میں نہ آئے

ایران نے امریکہ، برطانیہ اور فرانس کو سخت تنبیہ کی ہے کہ اگر ان ممالک نے اسرائیل کے خلاف تہران کے حالیہ میزائل حملوں کو روکنے یا ناکام بنانے کی کوشش کی تو خطے میں موجود ان کے فوجی اڈے اور بحری جہاز ایرانی نشانے پر ہوں گے۔ایرانی سرکاری ٹی وی کی رپورٹ کے مطابق جمعے کی رات اسرائیلی فضائی حملے میں تہران کے ایک رہائشی کمپلیکس پر بمباری کی گئی، جس کے نتیجے میں کم از کم 60 افراد جاں بحق ہوئے، جن میں 20 بچے بھی شامل ہیں۔

تہران اب محفوظ نہیں رہا: اسرائیلی فوج کا دعویٰ

دوسری جانب اسرائیلی فوج نے اعلان کیا ہے کہ ایران میں اس کی فضائی کارروائیوں کے نتیجے میں مغربی ایران سے لے کر تہران تک اسے مکمل فضائی برتری حاصل ہو چکی ہے اور ایرانی دارالحکومت اب کسی طرح بھی محفوظ نہیں رہا۔اسرائیلی فوج کے ترجمان بریگیڈیئر جنرل ایفی ڈیفرین نے صحافیوں کو بتایا کہ اسرائیلی فضائیہ نے گزشتہ رات 70 سے زائد جنگی طیاروں کی مدد سے تہران کے مختلف مقامات پر شدید بمباری کی، جس کے بعد وہاں کی فضائی حدود میں رکاوٹ باقی نہیں رہی۔انہوں نے مزید کہا کہ ہم نے تہران سمیت مغربی ایران کے کئی اہم اہداف کو کامیابی سے نشانہ بنایا ہے اور اب ہماری فضائی کارروائی کی راہ میں کوئی رکاوٹ نہیں رہی۔‘