نئی دہلی،۔ ہندوستان میں ایران کے سفارت خانے نے آیت اللہ سید مجتبیٰ خامنہ ای کے ایران کے سپریم لیڈر منتخب ہونے پر مبارکباد پیش کی ہے۔سفارت خانے نے کہا کہ یہ انتخاب ایران کے آئین میں فراہم کردہ قانونی طریقہ کار کے مطابق عمل میں آیا ہے۔

بیان میں کہا گیا۔ اللہ کے نام سے جو بڑا مہربان اور نہایت رحم کرنے والا ہے۔ نئی دہلی میں اسلامی جمہوریہ ایران کا سفارت خانہ ایران کی عظیم قوم اور دنیا بھر میں اسلامی جمہوریہ ایران کے تمام دوستوں اور حامیوں کو آیت اللہ سید مجتبیٰ خامنہ ای کے اسلامی جمہوریہ ایران کے سپریم لیڈر منتخب ہونے پر دلی مبارکباد پیش کرتا ہے۔

بیان میں کہا گیا کہ یہ انتخاب ایران کی خود مختاری کے اظہار کی عکاسی کرتا ہے۔

بیان کے مطابق یہ انتخاب اسلامی جمہوریہ ایران کے آئین میں فراہم کردہ قانونی طریقہ کار کے مطابق اور ایرانی قوم کے جائز نمائندوں کے ووٹ اور فیصلے کے ذریعے عمل میں آیا ہے۔ یہ ایران کے عوام کی آزادی اور قومی خود مختاری کا واضح اظہار ہے۔

سفارت خانے نے مزید کہا کہ ملک کی مسلح افواج امریکہ اور اسرائیل کے خلاف اپنی کارروائیاں جاری رکھیں گی۔

بیان میں کہا گیا کہ ایران کی عظیم قوم نے ایک بار پھر ثابت کر دیا ہے کہ وہ اپنی تقدیر کا فیصلہ صرف اپنے ارادے اور فیصلے کے ذریعے کرتی ہے۔ ان کی قیادت کا انتخاب ایرانی قوم کے اتحاد طاقت اور یکجہتی کو مزید مضبوط کرے گا۔ اسلامی جمہوریہ ایران کی مسلح افواج نئے عزم کے ساتھ مجرمانہ امریکی اور صہیونی حکومتوں کے خلاف اپنی جدوجہد جاری رکھیں گی۔ اس میں کوئی شک نہیں کہ آخری فتح ایران کی عظیم قوم کی ہوگی۔

دریں اثنا ایران کے فوجی اور سیاسی رہنماؤں نے آیت اللہ سید مجتبیٰ خامنہ ای سے وفاداری کا عہد کیا ہے جنہیں اپنے والد آیت اللہ علی خامنہ ای کی ہلاکت کے بعد ملک کا نیا سپریم لیڈر مقرر کیا گیا ہے۔ادھر اسرائیلی دفاعی افواج نے بھی کہا ہے کہ اس نے ایران کی فضائیہ کے ہیڈکوارٹر کو نشانہ بنایا ہے۔

اسرائیلی دفاعی افواج نے ایک بیان میں کہا کہ آئی آر جی سی کی فضائیہ کے ہیڈکوارٹر کو نشانہ بنایا گیا ہے جو ایران کی فضائی سرگرمیوں کی ہدایت کے لیے مرکزی کمانڈ اینڈ کنٹرول مرکز کے طور پر استعمال ہوتا تھا۔ اسرائیلی فوج نے کہا کہ یہ حملے ایران کے درجنوں اہداف پر وسیع کارروائی کے دوران کیے گئے۔