تہران،: امریکی افواج کی جانب سے لارک جزیرے پر حملے کے کچھ ہی دیر بعد ایران نے دعویٰ کیا ہے کہ اس نے اردن میں موجود دو امریکی فضائی اڈوں پر بیلسٹک میزائل داغے ہیں۔ ایرانی سرکاری میڈیا پریس ٹی وی کے مطابق میزائل حملوں میں امریکی فوجی تنصیبات کو نشانہ بنایا گیا۔

پریس ٹی وی نے اسلامی انقلابی گارڈ کور (IRGC) کی جانب سے جاری کردہ ویڈیو فوٹیج شیئر کرتے ہوئے دعویٰ کیا کہ بیلسٹک میزائل اردن میں موجود دو امریکی فضائی اڈوں کنگ حسین اور الازرق کے تکنیکی و مرمتی ڈھانچے اور جنگی طیاروں کی پوزیشنوں کی جانب داغے گئے۔

تاہم، عرب میڈیا ادارے العربیہ کے مطابق اردن کے فضائی دفاعی نظام نے ایرانی میزائلوں کو روک لیا۔

ایرانی جوابی کارروائی لارک جزیرے پر امریکی حملے کے فوراً بعد سامنے آئی ہے، جہاں حملے کے نتیجے میں متعدد افراد کے ہلاک اور زخمی ہونے کی اطلاعات ہیں۔ ایرانی نشریاتی ادارے IRIB نے دعویٰ کیا کہ لارک جزیرے پر امریکی حملہ دو مرحلوں میں کیا گیا۔ اس کے مطابق سیرک سے سنائی دینے والی دھماکوں کی آوازیں ایرانی دفاعی کارروائیوں کے نتیجے میں پیدا ہوئیں۔

امریکی ناکہ بندی برقرار، 83 تجارتی جہازوں کا رخ موڑا گیا

دوسری جانب امریکی سینٹرل کمانڈ (CENTCOM) نے کہا ہے کہ ایران کے خلاف امریکی ناکہ بندی بدستور جاری ہے۔ CENTCOM کے مطابق اتوار تک امریکی افواج نے ناکہ بندی کی پابندی یقینی بنانے کے لیے 83 تجارتی جہازوں کا رخ موڑا، تین کو ناکارہ بنایا اور دو پر سوار ہو کر کارروائی کی۔

CENTCOM نے ایک بیان میں کہا کہ امریکی بحری جہاز USS Delbert D. Black بحیرۂ عرب میں ایران کے خلاف امریکی ناکہ بندی نافذ کرنے کے دوران کارروائی کر رہا ہے۔

پاسدارانِ انقلاب کی ’بدلہ لینے‘ کی دھمکی

تازہ فوجی کارروائی سے قبل IRGC کے شعبۂ تعلقات عامہ نے ایک بیان جاری کرتے ہوئے ’’مجرموں سے براہِ راست بدلہ‘‘ لینے اور جارحیت کرنے والوں کو سزا دینے کا انتباہ دیا تھا۔

IRGC کے ترجمان اور شعبۂ تعلقات عامہ کے سربراہ حسین محبی نے امریکی فوجی کارروائی کی مذمت کرتے ہوئے اسے نئی امریکی اقتصادی پابندیوں کے ساتھ ایک ’’سنگین غلطی‘‘ قرار دیا۔

انہوں نے کہا کہ یہ کارروائی ٹرمپ انتظامیہ کی اقتصادی جنگ کے دوران ایک ’’حکمتِ عملی اور مہلک غلطی‘‘ ہے، جو اس کے منصوبہ سازوں کے خلاف حالات کا رخ موڑ دے گی اور انہیں اقتصادی اور فوجی دونوں محاذوں پر بھاری قیمت چکانا پڑے گی۔

تازہ فوجی کشیدگی ایسے وقت میں سامنے آئی ہے جب 24 اگست کو امریکی وزیر خزانہ اسکاٹ بیسنٹ نے ’’آپریشن اکنامک آؤٹ کاسٹ‘‘ شروع کرنے کا اعلان کیا تھا۔ اس مہم کا مقصد ایران کے عالمی مالیاتی نیٹ ورک اور حکومت کے آمدنی کے ذرائع کو محدود کرنا ہے۔