واشنگٹن

امریکہ اور ایران نے بدھ کے روز دو ہفتوں کے لیے ایک مشروط جنگ بندی پر اتفاق کر لیا ہے۔ اختلافات کو حل کرنے اور امن کے قیام کے لیے اسلام آباد میں دونوں فریقین کے درمیان مذاکرات ہونے ہیں۔ تاہم ایرانی اعلیٰ قیادت نے خبردار کیا ہے کہ لبنان پر اسرائیل کے حملے ان مذاکرات کو بے معنی بنا سکتے ہیں۔

اسی دوران حزب اللہ کے خلاف اسرائیلی فضائی حملوں کے بعد ایران نے بدھ کو آبنائے ہرمز کو ایک بار پھر بند کر دیا۔ وہیں وائٹ ہاؤس نے کہا کہ آبنائے ہرمز کو بند کرنا مکمل طور پر ناقابلِ قبول ہے۔

امریکی صدر ڈونلڈ ٹرمپ نے آبنائے ہرمز کے ذریعے تیل کی ترسیل کی اجازت نہ دینے پر ایران کو سخت تنقید کا نشانہ بنایا۔ اپنے سوشل میڈیا پلیٹ فارم ٹروتھ سوشل پر پوسٹ کرتے ہوئے انہوں نے کہا کہ ایران عالمی تیل کی آمد و رفت کے لیے اس اہم آبی راستے کو کھلا رکھنے کے معاہدے پر عمل کرنے میں ناکام رہا ہے۔ ٹرمپ نے لکھا کہ ایران آبنائے ہرمز سے تیل کی آمد و رفت کی اجازت دے کر انتہائی خراب کام کر رہا ہے، کچھ لوگ اسے شرمناک کہیں گے۔ یہ ہمارے معاہدے کے مطابق نہیں ہے۔

ایرانی فوج نے آبنائے ہرمز میں بارودی سرنگیں بچھا دیں

ایران کی بعض خبر رساں ایجنسیوں کے مطابق ایرانی فوج نے آبنائے ہرمز میں بارودی سرنگیں بچھا دی ہیں۔ یہ دنیا میں تیل کی ترسیل کے لیے ایک نہایت اہم آبی راستہ ہے جسے تہران نے بند کر دیا ہے۔ اس دوران صدر ڈونلڈ ٹرمپ نے خبردار کیا کہ اگر ایران معاہدے کی پاسداری نہیں کرتا تو امریکی فوج اس پر پہلے سے کہیں زیادہ شدید حملہ کرے گی۔

اسلام آباد میں سخت سکیورٹی

امریکہ اور ایران کے درمیان جمعہ کو اعلیٰ سطحی مذاکرات کی میزبانی کرنے والے پاکستان نے دارالحکومت اسلام آباد میں سکیورٹی کے سخت انتظامات کر دیے ہیں۔ تاہم ایرانی قیادت نے دوبارہ خبردار کیا ہے کہ لبنان پر اسرائیلی حملے مذاکرات کو بے معنی بنا سکتے ہیں۔ بدھ کو ہونے والی اس دو ہفتوں کی مشروط جنگ بندی کے بعد دونوں ممالک کے درمیان اختلافات کو ختم کر کے اسے مستقل امن میں تبدیل کرنے کے لیے اسلام آباد میں بات چیت متوقع ہے۔

مجوزہ مذاکرات سے چند گھنٹے قبل ایرانی صدر مسعود پزشکیان نے کہا کہ لبنان پر اسرائیل کا حملہ ابتدائی جنگ بندی کی کھلی خلاف ورزی ہے اور اس سے مذاکرات بے معنی ہو جائیں گے۔

مذاکرات میں ایران کی شرکت

پاکستان میں ایران کے سفیر رضا امیری نے تہران کے وفد کی شرکت کی تصدیق کرتے ہوئے کہا کہ اسرائیل کی جانب سے جنگ بندی کی بار بار خلاف ورزی کے باعث امن مذاکرات کے حوالے سے شکوک و شبہات موجود ہیں۔ انہوں نے سوشل میڈیا پلیٹ فارم "ایکس" پر لکھا کہ کہ اسرائیلی حکومت کی جانب سے جنگ بندی کی مسلسل خلاف ورزیوں کے باوجود، جو سفارتی کوششوں کو ناکام بنانے کی کوشش ہے، وزیر اعظم شہباز شریف کی دعوت پر ایرانی وفد آج رات اسلام آباد پہنچ رہا ہے تاکہ ایران کی جانب سے پیش کردہ 10 نکاتی منصوبے پر مذاکرات کیے جا سکیں۔