تہران: ایران نے اعلان کیا ہے کہ وہ آبنائے ہرمز کو اپنے دوست ممالک کے لیے کھول دے گا جس میں بھارت بھی شامل ہے۔ جاری جنگی صورتحال کے باوجود ایران اور بھارت کے تعلقات مضبوط برقرار ہیں اور دونوں ممالک سفارتی سطح پر مسلسل رابطے میں ہیں۔

حالیہ کشیدگی کے دوران آبنائے ہرمز کی بندش نے پوری دنیا کو تیل اور گیس کے بحران سے دوچار کر دیا تھا۔ صرف چند ہفتوں میں کئی ممالک میں مہنگائی بڑھ گئی اور کچھ حکومتوں کو ایندھن کی راشن بندی تک کرنی پڑی۔ ایسے میں ایران کا یہ اعلان عالمی سطح پر اہمیت اختیار کر گیا ہے اور خاص طور پر بھارت کے لیے ایک بڑی راحت کے طور پر دیکھا جا رہا ہے۔

ممبئی میں ایران کے قونصل جنرل نے کہا کہ بھارتی جہازوں کو محفوظ راستہ فراہم کرنے کا فیصلہ دونوں ممالک کے درمیان دیرینہ دوستی کا مظہر ہے۔ انہوں نے اس بات پر بھی زور دیا کہ ایران کو بھارت میں گیس کی ممکنہ قلت پر تشویش تھی اسی لیے یہ قدم اٹھایا گیا۔ حال ہی میں بھارتی پرچم بردار ایل پی جی ٹینکر نندا دیوی اور شیوَالک بھارت کی بندرگاہوں پر پہنچے ہیں جو اہم ایندھن کی سپلائی لے کر آئے۔

دوسری جانب جب ایران پر امریکہ اور اسرائیل نے حملہ کیا اور سپریم لیڈر آیت اللہ علی خامنہ ای جاں بحق ہوئے تو بھارت نے ابتدائی طور پر محتاط رویہ اختیار کیا۔ تاہم بعد میں بھارتی حکام نے ایران کے ساتھ اظہارِ تعزیت کیا اور سفارتی روابط کو برقرار رکھا۔

اسی سلسلے میں نریندر مودی نے ایران کے صدر سے بات چیت میں امن اور استحکام کے لیے مذاکرات اور سفارت کاری پر زور دیا۔ ماہرین کے مطابق ایران کا یہ فیصلہ نہ صرف خطے میں کشیدگی کو کم کرنے کی کوشش ہے بلکہ اس سے بھارت سمیت کئی ممالک کو توانائی کی سپلائی میں بڑی سہولت مل سکتی ہے۔