واشنگٹن: بھارتی فضائیہ کے سربراہ ایئر چیف مارشل اے پی سنگھ نے امریکہ میں اپنے امریکی ہم منصب چیف آف اسٹاف جنرل کین وِلسبَک کے ساتھ بھارت-امریکہ دفاعی تعلقات کو مزید مضبوط بنانے کی مشترکہ ترجیحات پر تبادلہ خیال کیا۔ سنگھ کا 8 اپریل کو جوائنٹ بیس ایناکوسٹیا-بولنگ میں مکمل فوجی اعزاز کے ساتھ استقبال کیا گیا۔

اپنے دورۂ امریکہ کے دوران بھارتی فضائیہ کے سربراہ نے پینٹاگون میں ایئر فورس کے امور کے وزیر ٹرائے مِینک اور جنرل وِلسبَک سے ملاقات کی۔ حکام کے مطابق واشنگٹن میں مصروفیات کے علاوہ، ایئر چیف مارشل سنگھ نے کولوراڈو میں پیٹرسن اسپیس فورس بیس کا بھی دورہ کیا، جہاں انہیں شمالی امریکہ ایئر ڈیفنس کمان (NORAD) کے مشن کے بارے میں تفصیلی بریفنگ دی گئی، جس میں فضائی حملوں کی وارننگ، فضائی حدود کے کنٹرول اور سمندری نگرانی شامل ہے۔

امریکی فضائیہ کے ایک بیان کے مطابق، بھارتی فضائیہ کے سربراہ نے نیواڈا میں نلس ایئر فورس بیس کا بھی دورہ کیا، جہاں انہیں امریکی ایئر فورس وارفیئر سینٹر کی سرگرمیوں سے آگاہ کیا گیا اور ایف-15 ای ایکس ایگل-2 طیارے کی پرواز کا مشاہدہ بھی کرایا گیا۔ بیان میں ایئر چیف مارشل سنگھ کے حوالے سے کہا گیا، “ایسے مواقع ہماری باہمی ہم آہنگی کو بڑھانے اور دونوں فضائی افواج کے درمیان اسٹریٹجک شراکت داری کو مضبوط کرنے کے لیے اہم ہیں۔”

دفتر میں ہونے والی ملاقاتوں کے دوران امریکی فضائیہ کے اعلیٰ حکام نے کہا کہ بھارت کے ساتھ دفاعی شراکت داری امریکہ کے لیے انتہائی اہم ہے۔ ان کے مطابق یہ شراکت داری ہند-بحرالکاہل خطے کو آزاد، کھلا، پُرامن اور خوشحال رکھنے میں کلیدی کردار ادا کرتی ہے۔

جنرل وِلسبَک نے ہم خیال شراکت داروں کے ساتھ کثیرالملکی مشقوں میں بھارت کی قیادت اور شرکت کو سراہا اور کہا کہ ایسے تعاون کو ترجیح دینا اور اس کا دائرہ بڑھانا علاقائی استحکام کے لیے ضروری ہے۔ انہوں نے بھارت کی جانب سے ایم کیو-9 بی اسکائی گارڈین ڈرون کی خریداری کا بھی خیرمقدم کیا اور کہا کہ امریکی فضائیہ اس بات کو یقینی بنانے کے لیے پرعزم ہے کہ بھارتی مسلح افواج اس نظام کو مؤثر اور بغیر کسی رکاوٹ کے استعمال کر سکیں۔

انہوں نے مزید کہا کہ امریکی فضائیہ بھارت کی جدید کاری کی کوششوں کی مکمل حمایت کے لیے تیار ہے اور دفاعی صنعتی تعاون کے ذریعے ان مقاصد کے حصول کے باہمی فوائد کو اجاگر کیا۔ انہوں نے کہا،ایئر چیف مارشل اے پی سنگھ کی میزبانی کرنا ہمارے لیے اعزاز کی بات ہے۔