نئی دہلی: سرکاری ذرائع نے منگل کو بتایا کہ انتخابی انتظام کے شعبے میں ہندوستان ایک قابلِ اعتماد شراکت دار کے طور پر ابھر رہا ہے اور اپنے دوست ممالک کے ساتھ ٹیکنالوجی، ادارہ جاتی تجربہ اور بہترین انتخابی طریقۂ کار کا اشتراک کر رہا ہے۔

ذرائع کے مطابق، ہندوستان اور انڈونیشیا انتخابی انتظام اور خاص طور پر تیار کی گئی الیکٹرانک ووٹنگ مشینوں (ای وی ایم) کی برآمد سے متعلق ایک مفاہمتی یادداشت (ایم او یو) پر دستخط کرنے والے ہیں۔ دنیا کی تیسری بڑی جمہوریت انڈونیشیا کی آبادی تقریباً 28 کروڑ 80 لاکھ ہے۔ اس نے اپنے انتخابی نظام کو جدید بنانے کے لیے انتخابی ٹیکنالوجی، انتظامی مہارت اور ادارہ جاتی تعاون کے حصول کی غرض سے ہندوستان سے رابطہ کیا ہے۔

ایک سرکاری عہدیدار نے کہا کہ جب دنیا بھر کی جمہوریتیں انتخابی عمل سے متعلق قابلِ اعتماد مہارت کی تلاش میں ہیں تو ہندوستان ان کی پہلی ترجیح بن کر ابھرا ہے۔ انہوں نے اس کی مثال دیتے ہوئے کہا کہ انڈونیشیا کی جانب سے ہندوستان سے ای وی ایم حاصل کرنے کی خواہش اس اعتماد کا واضح ثبوت ہے۔