نیو دہلی: وزیر اعظم نریندر مودی، جو برازیل کے سرکاری دورے پر ہیں، نے منگل کی دیر رات برازیل کے صدر لولا ڈی سلوا سے ملاقات کے بعد ایک مشترکہ بیان میں کہا کہ ہندوستان اور برازیل ہر شعبے میں تعاون کو مضبوط بنا کر دو طرفہ تجارت کو 20 ارب ڈالر تک لے جانے کا ہدف رکھتے ہیں۔

انہوں نے صدر لولا کو ہندوستان-برازیل اسٹریٹجک شراکت داری کا مضبوط حامی قرار دیتے ہوئے کہا کہ دونوں ممالک کے تعلقات کو فروغ دینے میں صدر لولا کا کردار نمایاں رہا ہے۔ وزیر اعظم نے کہا، ’’ہماری آج کی گفتگو میں ہم نے ہر شعبے میں باہمی تعاون کو فروغ دینے پر زور دیا۔ ہم نے آئندہ پانچ برسوں میں دو طرفہ تجارت کو 20 ارب ڈالر تک لے جانے کا ہدف طے کیا ہے۔‘‘

انہوں نے مزید کہا کہ دونوں ممالک ہندوستان-مرکوسور ترجیحی تجارتی معاہدے کی توسیع کے لیے بھی مل کر کام کریں گے۔

وزیر اعظم مودی نے کہا کہ دہشت گردی کے خلاف جنگ کے حوالے سے بھی دونوں ملکوں کی سوچ ایک جیسی ہے۔ انہوں نے کہا کہ دونوں ممالک نے دہشت گردی کے خلاف زیرو ٹالرنس اور دوہرے معیار کی سختی سے مخالفت کرنے پر اتفاق کیا ہے۔ ’’ہمارا مؤقف واضح ہے کہ دہشت گردی پر کسی قسم کے دوہرے معیار کی کوئی گنجائش نہیں ہے۔ ہم نہ صرف دہشت گردی کی بلکہ دہشت گردی کی حمایت کرنے والوں کی بھی شدید مخالفت کرتے ہیں۔‘‘

وزیر اعظم نے برازیل کی جانب سے انہیں اعلیٰ ترین قومی اعزاز سے نوازنے پر شکریہ ادا کیا۔ انہوں نے کہا، ’’صدر لولا کی جانب سے مجھے برازیل کا اعلیٰ ترین قومی اعزاز عطا کیا جانا میرے لیے نہیں بلکہ 140 کروڑ ہندوستانیوں کے لیے فخر اور جذبات کا لمحہ ہے۔ میں اس اعزاز کے لیے صدر لولا، برازیل کی حکومت اور وہاں کے عوام کا تہہ دل سے شکریہ ادا کرتا ہوں۔‘‘

انہوں نے کہا کہ توانائی کے شعبے میں دونوں ممالک کے درمیان تعاون میں مسلسل اضافہ ہو رہا ہے۔ ماحولیاتی تحفظ اور صاف توانائی دونوں کی ترجیحات میں شامل ہیں۔ انہوں نے کہا، ’’اس شعبے میں تعاون بڑھانے کے لیے آج کیا گیا معاہدہ ہمارے سبز اہداف کو نئی سمت اور رفتار دے گا۔ میں صدر لولا کے لیے نیک خواہشات کا اظہار کرتا ہوں کہ وہ اس سال برازیل میں ہونے والی کوپ-30 کانفرنس کی کامیاب میزبانی کریں۔‘‘