اسلام آباد: پاکستان کے جیل میں بند سابق وزیر اعظم عمران خان کی پارٹی نے منگل کو سپریم کورٹ میں توہین عدالت کی درخواست دوبارہ دائر کر دی، جس میں 18 اگست کے عدالتی حکم کی مبینہ خلاف ورزی کا معاملہ اٹھایا گیا ہے۔ عدالتی حکم میں عمران خان کو علاج کے لیے ایک نجی اسپتال منتقل کرنے کی ہدایت دی گئی تھی۔

پاکستان تحریک انصاف (پی ٹی آئی) نے عدالت کی جانب سے تکنیکی اعتراضات کے ساتھ درخواست واپس کیے جانے کے چند گھنٹوں بعد اسے دوبارہ جمع کرا دیا۔ 73 سالہ عمران خان کی بہن عظمیٰ خان نے یہ درخواست دائر کرتے ہوئے حکومت پر الزام لگایا کہ وہ پی ٹی آئی کے بانی کو علاج کے لیے اسلام آباد کے شفا انٹرنیشنل اسپتال منتقل کرنے میں ناکام رہی۔

سپریم کورٹ نے عظمیٰ کی درخواست تکنیکی بنیادوں پر واپس کر دی تھی، تاہم پی ٹی آئی کے وکلا نے فوری طور پر عدالت کی جانب سے اٹھائے گئے اعتراضات دور کرکے درخواست دوبارہ دائر کر دی۔ پی ٹی آئی کے چیئرمین گوہر خان نے کہا کہ اعتراضات میں سے ایک یہ تھا کہ درخواست گزار نے حکومت کے خلاف لگائے گئے الزامات کی فہرست فراہم نہیں کی تھی۔ انہوں نے کہا تھا، ’’ہم درخواست دوبارہ دائر کریں گے۔‘‘ 22 اگست کو عظمیٰ نے سپریم کورٹ سے رجوع کیا تھا، جب عمران خان کو 20 اور 21 اگست کی درمیانی شب آنکھ کے ایک طبی عمل اور دیگر تشخیصی معائنوں کے لیے نجی شفا اسپتال کے بجائے سرکاری پاکستان انسٹی ٹیوٹ آف میڈیکل سائنسز (پمز) لے جایا گیا۔

اس کے بعد انہیں دوبارہ اڈیالہ جیل منتقل کر دیا گیا۔ درخواست میں کہا گیا ہے کہ یہ اقدام سپریم کورٹ کے اس حکم کی خلاف ورزی ہے، جس کے تحت عمران خان کو آئندہ سماعت، یعنی 16 ستمبر تک اسلام آباد کے اسپتال میں داخل رہنا تھا۔ عظمیٰ نے اپنی درخواست میں سپریم کورٹ سے استدعا کی کہ عدالتی حکم کی ’’جان بوجھ کر، دانستہ اور توہین آمیز نافرمانی اور خلاف ورزی‘‘ پر فریقین کے خلاف توہین عدالت کی کارروائی شروع کی جائے۔ فریقین میں وزیر اعظم شہباز شریف، وزیر قانون اعظم نذیر تارڑ، وزیر اطلاعات عطا اللہ تارڑ اور متعدد اعلیٰ سرکاری عہدیدار، جن میں اڈیالہ جیل کے سپرنٹنڈنٹ ساجد بیگ بھی شامل ہیں۔

درخواست میں کہا گیا کہ فریقین کی جانب سے سپریم کورٹ کے حکم پر عمل نہ کرنے اور ’’کھلی خلاف ورزیوں‘‘ کے باعث عدالت سے رجوع کیا گیا ہے۔ درخواست میں کہا گیا، ’’فریقین کے اپنے اعترافات سے واضح ہے کہ 18 اگست کے حکم میں دی گئی عدالتی ہدایات کی خلاف ورزی کی گئی۔‘‘ اس میں کہا گیا کہ عمران خان کو شفا انٹرنیشنل اسپتال منتقل نہ کیے جانے سے ’’اس بات میں کوئی شبہ نہیں رہتا‘‘ کہ فریقین نے جان بوجھ کر سپریم کورٹ کے حکم کو نظر انداز کیا اور اس کی خلاف ورزی کی۔ درخواست میں مزید کہا گیا کہ فریقین کے طرز عمل سے سپریم کورٹ کی اتھارٹی متاثر ہوئی ہے اور اس معاملے کا عدالتی نوٹس لیا جانا چاہیے۔

تاہم حکومت نے شفا اسپتال کے بجائے عمران خان کو پمز لے جانے کے فیصلے کا دفاع کرتے ہوئے سکیورٹی خدشات کا حوالہ دیا ہے۔ اسپتال انتظامیہ کے مطابق، شفا انٹرنیشنل اسپتال کے دو ماہر ڈاکٹروں نے بھی پمز میں عمران خان کی آنکھ کے معائنے میں حصہ لیا۔ دریں اثنا، حکومت نے بھی سپریم کورٹ میں درخواست دائر کرکے سابق کرکٹر سے سیاست دان بننے والے عمران خان کو نجی اسپتال منتقل کرنے کے حکم پر نظرثانی اور اسے واپس لینے کی اپیل کی ہے۔ حکومت کا مؤقف ہے کہ یہ حکم امتیازی ہے کیونکہ اس کا اطلاق صرف عمران خان پر ہوتا ہے اور اس سے دوسرے قیدیوں کے لیے بھی نجی اسپتالوں میں علاج کی درخواست کرنے کی مثال قائم ہو سکتی ہے۔

سپریم کورٹ کا حکم عمران خان کے اہل خانہ اور حامیوں کی جانب سے ان کی صحت، خاص طور پر اس سال کے اوائل میں تشخیص ہونے والے آنکھ کے عارضے، پر کئی ماہ سے ظاہر کی جانے والی تشویش کے بعد آیا تھا۔ ان کے حامی ان کی گرفتاری کے خلاف احتجاج جاری رکھے ہوئے ہیں۔ ان کے اہل خانہ اور پارٹی ساتھیوں نے بارہا انسانی حقوق کی خلاف ورزیوں کے الزامات لگاتے ہوئے کہا ہے کہ حکام انہیں مناسب طبی سہولیات، اہل خانہ سے ملاقات اور قانونی مشاورت تک رسائی محدود کر رہے ہیں۔ حکومت نے ان الزامات کو مسترد کر دیا ہے۔ عمران خان کو 5 اگست 2023 کو بدعنوانی کے ایک مقدمے میں گرفتار کیا گیا تھا اور وہ تب سے حراست میں ہیں۔ انہیں راولپنڈی کے مضافات میں واقع اڈیالہ جیل میں رکھا گیا ہے۔