برامٹن (کینیڈا): دو دہائیوں سے کینیڈا کے برامپٹن سے ہندی میگزین 'ہندی ٹائمز' شائع کرنے والے راکیش تیواری نے کہا ہے کہ یہاں رہنے والے ہندوستانی ہندوستان اور کینیڈا کے درمیان موجودہ تنازعہ سے بہت پریشان ہیں۔راکیش تیواری کو لگتا ہے کہ اگر حالات مزید خراب ہوتے ہیں تو یہاں رہنے والے ہندوستانیوں کو پریشانی کا سامنا کرنا پڑ سکتا ہے۔ آواز دی وائس ہندی کے ایڈیٹر ملک اصغر ہاشمی کے ساتھ فون پر بات چیت کے دوران 'ہندی ٹائمز' میگزین کے چیف ایڈیٹر راکیش تیواری نے شکایتی لہجے میں کہا کہ ہندوستانی میڈیا دونوں ممالک کے تعلقات خراب کرنے پر تلا ہوا ہے۔ ہندوستانی میڈیا میں کینیڈا کے وزیر اعظم پر ذاتی حملے کیے جا رہے ہیں جو کسی بھی ذمہ دار میڈیا کو زیب نہیں دیتے۔

انہوں نے اس کے لیے خاص طور پر ہندی نیوز چینلز کو ذمہ دار ٹھہرایا۔ ایک سوال کے جواب میں انہوں نے اعتراف کیا کہ کینیڈا میں رہنے والے نہ صرف ہندوستانی بلکہ کینیڈین بھی مانتے ہیں کہ یہاں ایک دہشت گرد کی حالیہ ہلاکت میں ہندوستان کا کوئی کردار نہیں ہوسکتا ہے۔انہوں نے کہا کہ ہندوستان کو اس تنازعے کو پختہ سطح تک لے جانا چاہئے۔ سفارت کاری کے ذریعے مسئلے کا جلد حل نکالنا چاہئے۔ ہندوستان، کینیڈا کی تحقیقات میں مدد کرے۔ یہ معاملہ جی 20 فورم کے ذریعے بھی حل کیا جا سکتا ہے۔

انہوں نے ہندوستان کی جانب سے کینیڈا کا نیا ویزا نہ دینے کے فیصلے پر تشویش کا اظہار کیا۔راکیش تیواری نے کہا کہ کینیڈا میں ڈھائی سے تین لاکھ ہندوستانی طلباء رہتے ہیں۔ اس کے علاوہ یہاں تقریباً 20 لاکھ ہندوستانی ہیں۔ 30 سال پہلے وہ خود قانون کی تعلیم حاصل کرنے کے لیے گورکھپور، ہندوستان سے ٹورنٹو، کینیڈا آئے تھے۔ انہوں نے کہا کہ ہندوستان اور کینیڈا جب بھی کوئی فیصلہ لیں تو انہیں اس پہلو پر بھی غور کرنا چاہئے۔ اس سوال کے جواب میں کہ کیا کینیڈا میں رہنے والے ہندوستانیوں کو موجودہ تنازعہ کی وجہ سے کسی قسم کی پریشانی کا سامنا ہے۔

راکیش تیواری نے کہا کہ یہ ملک بہت پرامن ہے۔ یہاں تمام مذاہب کے لوگ مل جل کر رہتے ہیں۔ ابھی تک یہاں رہنے میں کسی قسم کی پریشانی کا سامنا نہیں کرنا پڑا لیکن اگر جھگڑا اسی طرح چلتا رہا تو پریشانی ہو سکتی ہے۔ خالصتانیوں اور مجرموں کے کینیڈا میں پناہ لینے کے بارے میں پوچھے گئے ایک سوال کے جواب میں انہوں نے کہا کہ پہلے کسی نے ان پر کوئی توجہ نہیں دی۔ اب یہاں کے لوگوں کو احساس ہونے لگا ہے کہ وہ ان کے لیے مسئلہ بن رہا ہے۔ ایسے میں اب یہاں رہنے والے ہندوستانی خالصتانیوں کو لے کر بے چینی محسوس کر رہے ہیں۔

اس کے ساتھ ہی انہوں نے کینیڈین وزیر اعظم ٹروڈو کا دفاع کرتے ہوئے کہا کہ وہ خالصتانیوں کی بالکل حمایت نہیں کرتے۔ اور نہ ہی اب تک ان کی طرف سے ایسا کوئی بیان آیا ہے۔ بلکہ خالصتانی خود حکومت کے لیے مسئلہ بننے لگے ہیں۔ ٹروڈو حکومت میں وزیر صحت رہنے والے اجول دوسانجھ کو خالصتانیوں کی مخالفت کرنے پر نشانہ بنایا گیا۔

کینیڈا سے ہندی میگزین نکالنے کے بارے میں پوچھے گئے سوال کے جواب میں راکیش تیواری نے کہا کہ یہاں ہندی پھیل رہی ہے۔ لوگوں نے ہندی پڑھنا لکھنا شروع کر دیا ہے۔ ایک دوسرے کے تعاون سے یہاں ہندی صحافت پھل پھول رہی ہے۔ بہت سے لوگ ان کے ساتھ کام کرتے ہیں۔ راکیش تیواری ہندی ٹائمز سے روزانہ شام کو ایک گھنٹے کا پوڈ کاسٹ ریڈیو بھی چلاتے ہیں۔