ٹلہاسی (امریکہ): خلا میں جانا انسانی جسم کے لیے ایک بڑا چیلنج ہے اور ایک نئی تحقیق سے معلوم ہوا ہے کہ خلائی سفر کے بعد دماغ کھوپڑی کے اندر اوپر اور پیچھے کی جانب سرک جاتا ہے اور اس کی ساخت میں بھی کسی حد تک تبدیلی آتی ہے۔ محققین کے مطابق جو افراد زیادہ عرصے تک خلا میں رہے، ان میں یہ تبدیلیاں زیادہ نمایاں تھیں۔

ناسا کے طویل المدتی خلائی مشنز اور پیشہ ور خلابازوں سے آگے عام شہریوں تک خلائی سفر کے پھیلاؤ کے تناظر میں یہ نتائج خاص اہمیت رکھتے ہیں۔ زمین پر کششِ ثقل جسم اور دماغ کے مائعات کو نیچے کی طرف کھینچتی ہے۔ خلا میں کششِ ثقل نہ ہونے کے باعث جسمانی رطوبات سر کی جانب منتقل ہو جاتی ہیں، جس سے خلابازوں کا چہرہ سوجا ہوا دکھائی دیتا ہے۔

عام کششِ ثقل میں دماغ، دماغی نخاعی سیال (سیریبرواسپائنل فلوئیڈ) اور اردگرد کے بافتیں توازن میں رہتے ہیں، لیکن خرد کششِ ثقل (مائیکرو گریوٹی) میں یہ توازن بدل جاتا ہے۔ کششِ ثقل کی عدم موجودگی میں دماغ کھوپڑی کے اندر “تیرنے” لگتا ہے اور نرم بافتوں اور خود کھوپڑی کی جانب سے مختلف دباؤ کا سامنا کرتا ہے۔ پہلے کی تحقیقات میں دیکھا گیا تھا کہ خلائی سفر کے بعد دماغ کھوپڑی میں اوپر کی جانب واقع نظر آتا ہے، تاہم زیادہ تر مطالعات اوسط یا مجموعی دماغی پیمائش پر مرکوز تھے، جس سے مختلف حصوں میں ہونے والی باریک تبدیلیاں نمایاں نہیں ہو پاتی تھیں۔

تحقیقی ٹیم نے 26 خلابازوں کے دماغ کے ایم آر آئی اسکین کا تجزیہ کیا، جنہوں نے چند ہفتوں سے لے کر ایک سال سے زیادہ عرصہ خلا میں گزارا تھا۔ خلائی سفر سے پہلے اور بعد کے اسکینز کا موازنہ کرنے کے لیے ہر فرد کی کھوپڑی کو بنیاد بنا کر تصاویر کو ہم آہنگ کیا گیا۔

دماغ کو ایک اکائی کے طور پر دیکھنے کے بجائے اسے 100 سے زائد حصوں میں تقسیم کر کے ہر حصے میں ہونے والی تبدیلی کو الگ الگ ناپا گیا۔ اس طریقہ کار سے ایسے نمونے سامنے آئے جو مجموعی اوسط کے تجزیے میں ظاہر نہیں ہوتے تھے۔ مطالعے میں پایا گیا کہ خلائی سفر کے بعد دماغ مسلسل اوپر اور پیچھے کی جانب سرکتا ہے۔ خلا میں قیام جتنا طویل تھا، تبدیلیاں بھی اتنی ہی زیادہ تھیں۔

بین الاقوامی خلائی اسٹیشن پر تقریباً ایک سال گزارنے والے خلابازوں میں دماغ کے بالائی حصے کے بعض علاقے دو ملی میٹر سے زیادہ اوپر سرک گئے، جبکہ دیگر حصوں میں نسبتاً کم تبدیلی دیکھی گئی۔ محققین کے مطابق کھوپڑی جیسی محدود جگہ میں یہ فاصلہ بھی اہمیت رکھتا ہے۔ حرکت اور حسیات سے متعلق دماغی حصوں میں سب سے زیادہ تبدیلی دیکھی گئی۔

دماغ کے دونوں اطراف کی ساختیں درمیانی خط کی جانب سرک گئیں، جس سے دونوں نصف کروں میں مخالف سمتوں میں تبدیلی پیدا ہوئی۔ یہی وجہ ہے کہ مجموعی اوسط کے تجزیے میں یہ فرق واضح نہیں ہو سکا تھا۔ زیادہ تر تبدیلیاں زمین پر واپسی کے چھ ماہ کے اندر بتدریج معمول پر آ گئیں۔ تاہم پیچھے کی جانب ہونے والی سرکاؤ میں نسبتاً کم بہتری آئی، ممکنہ طور پر اس لیے کہ زمین کی کششِ ثقل نیچے کی طرف کھینچتی ہے، آگے کی طرف نہیں۔

ناسا کا “آرٹیمس” پروگرام خلائی تحقیق کے ایک نئے دور کا آغاز کرے گا۔ محققین کا کہنا ہے کہ دماغ میں ہونے والی ان تبدیلیوں کو سمجھنا طویل مدتی خطرات کا اندازہ لگانے اور حفاظتی اقدامات وضع کرنے میں مددگار ثابت ہوگا۔ مطالعے میں یہ بھی واضح کیا گیا ہے کہ ان نتائج کا مطلب یہ نہیں کہ لوگوں کو خلائی سفر سے گریز کرنا چاہیے۔

اگرچہ حسی عمل سے متعلق ایک حصے میں زیادہ تبدیلی اور زمین پر واپسی کے بعد توازن میں فرق کے درمیان تعلق دیکھا گیا، لیکن کسی بھی خلاباز میں سر درد یا “برین فوگ” جیسی واضح علامات ظاہر نہیں ہوئیں۔ محققین کے مطابق یہ نتائج فوری صحت کے خطرے کی نشاندہی نہیں کرتے، بلکہ یہ سمجھنے میں مدد دیتے ہیں کہ خرد کششِ ثقل انسانی جسمانی افعال کو کس طرح متاثر کرتی ہے اور محفوظ خلائی مشنز کی منصوبہ بندی میں کس طرح معاون ہو سکتی ہے۔